Бэс ыйын 19 күнүгэр улуустааҕы социальнай кэлим киин стационарнай отделениетын тиэргэн... — 22 июня 2026 г. в 08:55:52.649
Бэс ыйын 19 күнүгэр улуустааҕы социальнай кэлим киин стационарнай отделениетын тиэргэнигэр сайыны көрсүү үөрүүлээх дьоро күнэ буолан ааста. Тэрээһин арыллыытыгар алгысчыт Охлопкова Сардаана Егоровна- Харсаада анаан-минээн кэлэн айыыларга сүгүрүйүү сиэрин-туомун оҥордо. Тэрээһини Наталья Гуляева уонна Дьулустан Заболоцкай кыайа-хото тутан, иилээн-саҕалаан ыыттылар. Улуустааҕы социальнай кэлим киин салайааччытын солбуйааччы Елена Егоровна Кривошапкина оҕолорго үчүгэй, умнуллубат сайыҥҥы сынньалаҥы атаардыннар диэн эҕэрдэтин кытары баҕа санаатын тиэртэ. Өбүгэ үгэһин салҕаан, сайыны көрсүү сиэрэ-туома ыытыллан оҕолорбутугар, төрөппүттэрбитигэр ураты тыыны биэрдэ. Салгыы «Кустук» оҕо сайыҥҥы былаһааккатын бастакы сезонун түмүктүүр үөрүүлээх чааһыгар сезон салайааччыта Юлия Бурцева оҕолорго биирдиилэригэр анал ааттары уонна маастар-кылааска оҥорбут оҥоһуктарын, минньигэстэри туттартаан оҕолор үөрүүлэрэ үрдэ суох буолла. Оҕолорбут кэнсиэрдэрин үөрэ-көтө, астына, дуоһуйа көрдүбут, салгыы икки бөлөххө өбүгэ оонньууларыгар күрэх ыытылынна. Сылын аайы кыттыыны ылар волонтербут Варвара Николаевна Саввина оҕолорбутугар анаан минньигэс торт бэлэх уунна. Күрэххэ кыттыбыт оҕолорбут бука бары Добун суруктарынан, бэлэхтэринэн, үтэһэлээх этинэн наҕараадаланнылар. Тэрээһини оҕолорбут минньигэс астаах остуолунан түмүктээтилэр. Төрөппүттэр уонна оҕолор астынан, дуоһуйан тарҕастылар. ✍️Юлия Бурцева, социальнай педагог 📲Мах-каналбытыгар сурут ⬇️ https://max.ru/join/3C9ZQLhT3NOAcTqvoqV7q1JihA40sSL8ZGoFY5jwqMU 🌐мюрюгазета.рф ✅ @uamurusahargata @ulusmedia