*Сабантуй+Ыһыах*
*Сабантуй+Ыһыах* 2026 сыл Дойду үрдүнэн Сомоҕолоһуу сылынан биллэриллибитэ. Ол чэрчитинэн бэс ыйын 5-6 күннэригэр Саха Өрөспүүбүлүкэтэ уонна Татарстан Өрөспүүбүлүкэтэ доҕордоһуу сыһыан олохтуур сыаллаах Нижнекамск куоратыгар ыытыллыбыт Сабантуй + Ыһыах тэрээһин үрдүк таһымнаахтык ааста. Дьокуускай куорат дьаһалтатын көҕүлээһининэн сахалар ыһыахпытын, төрүт дьарыкпытын, оонньуулары, аспытын-үөлбүтүн билиһиннэрдибит. Уус-Алдан улууһуттан 13 буолан кыттыыны ыллыбыт. Ол курдук, Өлтөх нэһилиэгиттэн "Ырыам уонна сибэкки" вокальнай ансаамбыл (сал. Карамзина Евдокия Егоровна), Мүрү нэһилиэгиттэн хомусчут Заболоцкай Дьулустан Михайлович, культура управлениятын методиһа Лугинова Анна Егоровна, Олоҥхо дьиэтин специалиһа Герасимова Матрена Николаевна, Бээрийэ нэһилиэгиттэн иистэнньэҥ Васильева Екатерина Николаевна, Суотту нэһилиэгиттэн иистэнньэҥ Иванова Евдокия Иннокентьевна, Бэрт Ууһун нэһилиэгиттэн олоҥхоһут, оһуохайдьыт Герасимов Кондратий Федотович ыраах айаны уйунан, талааннарын, сатабылларын көрдөрөн кэллилэр. Евдокия Иванова тирииттэн сэлиэччик киэргэтэн тигиигэ, Екатерина Васильева ситии хатан туос иһит тигиитигэр маастар кылаас биэрдилэр. Дьулустан Заболоцкай тыыннаах доҕуһуол бөлөххө кыттыһан араас түһүлгэлэргэ, концертка кытынна, Кондратий Герасимов көрсүһүүлэргэ, концертарга норуот ырыатын ыллаата, оһуохайдаата, "Ырыам уонна сибэкки" вокальнай ансаамбыл ыһыах сиэригэр-туомугар арчылаатылар, концертка кытыннылар, Евдокия Иванова "Зов предков", Мавра Местникова "Куорсун Ходоҕой" коллекцияларын көрдөрдүлэр, Анна Лугинова, Надежда Колодезникова, Матрена Герасимова ыһыах сиэригэр-туомугар, быыстапка туруоруутугар, делегацияны салайан илдьэ сырыттылар. Саха норуотун сатабылын, талаанын көрдөрөр быыстапкаҕа үлэлэрин ыыттылар Мүрү нэһилиэгиттэн "Мүрү оһуора" түмсүү, салайааччы Бочкарева Екатерина Михайловна кырадаһынтан тигиллибит панноларын, Хоро нэһилиэгиттэн Петрова Мария Егоровна, Дүпсүн нэһилиэгиттэн Соловьева Пелагея Васильевна суҥ сөрүөлэрин, Босикова Александра Гаврильевна сарыы этэрбэстэрин, суумкаларын, Найахы нэһилиэгиттэн Пестерева Маргарита Алексеевна сиэл сөрүөтүн, Сивцева Варвара Николаевна тирии хааһаҕын, Баатаҕай нэһилиэгиттэн Данилова Людмила Ивановна сылгы быатын-туһаҕын, Бочкарева Екатерина Михайловна, Дегтярева Татьяна Гаврильевна ат толору симэҕин, Слепцова Елена Гаврильевна, Бурнашева Анна Афанасьевна, Иванова Евдокия Иннокентьевна кырадаһынтан панноларын, 1 Өспөх нэһилиэгиттэн Гуляева Оксана Николаевна туой оҥоһуктарын, биир дойдулаахпыт Бурцев Мичил Николаевич чорооннорун, Васильева Екатерина Николаевна туос иһиттэрин, саламатын, Бороҕон нэһилиэгиттэн Габышева Анастасия Гаврильевна таба тириититтэн Хотойдоох сонун комплегын, этэрбэһин, Лөгөй нэһилиэгиттэн "Ураннар" түмсүү "Ыйдар бэлиэлэрэ" кылтан-сиэлтэн панноларын. Маннык улахан тэрээһиҥҥэ дойдуларын аатын ааттаппыт дьоммутугар истиҥ махталбытын тиэрдэбит. Матрена Герасимова, "Олоҥхо Дьиэтэ" ЭКК сүрүннүүр специалиһа