Кэбээйи кэрэ сиригэр ыытыллыбыт Олоҥхо ыһыаҕар хомусчуттар түһүлгэлэрэ элбэх кыттааччын... — 6 июля 2026 г. в 07:01:44.581
Кэбээйи кэрэ сиригэр ыытыллыбыт Олоҥхо ыһыаҕар хомусчуттар түһүлгэлэрэ элбэх кыттааччыны, көрөөччүнү түмтэ. Ол курдук, хомусчуттар «ХОМУС ХОМУҺУН ДОРҔООННОРО”биирдиилээн уонна бөлөҕүнэн толоруу күөн-күрэскэ барыта 50-тэн тахса киһи кыттыыны ылла. Биһиги улуустан Дүпсүн сириттэн М.М. Соловьева тэрийбит “Ситим” хомусчуттар бөлөхтөрө (сал.Ноябрина Сивцева) бөлөҕүнэн толорууга кыттаннар “Өбүгэ ситимэ” анал аакка тигистилэр. Хомус уустара «ХОМУС ҮӨСКҮҮР ДЬИКТИТЭ» үгэскэ олоҕуран оҥоруу күөн-күрэһигэр барыта 10–тан тахса хомус ууһа кытынна. Дьүүллүүр сүбэҕэ Хомус аан дойдутааҕы киинин уонна түмэлин директора Дмитрий Бэстиинэп, аан дойду виртуоз хомусчута Альбина Дегтярева уонна былырыын Нерюнгри куоракка ыытыллыбыт Олоҥхо ыһыаҕар Хомус уустарын күөн-күрэһин муҥутуур кыайыылааҕа, Бэрт-Ууһуттан хомус ууһа Александр Шепелев үлэлээтилэр. Биир дойдулаахпыт, СӨ норуотун маастара, хомус ууһа, Кэбээйилэр күндү күтүөттэрэ Артем Киренскай «ҮРГЭЛ» ааптарскай ньыматынан оҥоһуллубут хомуһу оҥоруу күөн-күрэһигэр барыта 13 хомус уустара кытыннылар. Бу күөн-күрэскэ биһиги улууспут уустара үс сүрүн бириистэри ыллылар. Ол курдук, 3 миэстэ Петр Куличкин-Быйаман Уус (Мүрү), 2 миэстэ Спиридон Алексеев (Дүпсүн) уонна 1-кы миэстэни Байаҕантайтан төрүттээх Роман Готовцев-Мындыр Уус ыллылар. “КУЙААР КУТУЛЛАР ДОРҔООНО” кылыһах-кырыымпаҕа оонньооччулар күөн-күрэстэригэр 21 киһи кыттыыны ылла. Биһиги улуустан Василий Тимофеев (Курбуһах) 3 Үрдэл хаһаайына буолан 20.000 солкуобай харчынан наҕараадаланна. Анна Лугинова, улуустааҕы культура управлениятын сүрүннүүр специалиһа