Бүгүн киэн туттар биир дойдулаахпыт саха бэйиэтэ, ССРС, Арассыыйа, Саха сирин суруйаач... — 3 июля 2026 г. в 04:16:33.888
Бүгүн киэн туттар биир дойдулаахпыт саха бэйиэтэ, ССРС, Арассыыйа, Саха сирин суруйааччыларын сойууһун чилиэнэ, Саха Өрөспүүбүлүкэтин култууратын үтүөлээх үлэһитэ Анатолий Гаврилович Старостин – Сиэн Кынат 80 сааһын туолла. Бу бэлиэ күҥҥэ анаан С.С.Васильев-Борогонскай аатынан киин библиотека "Алгыс" кыраайы үөрэтэр салаатыгар "Аал уоппар итэҕэлим" диэн кинигэ быыстапката турда. Анатолий Гаврилович Уус Алдан улууһугар Түүлээх нэһилиэгин Кылаайы сэлиэнньэтигэр от ыйын 3 күнүгэр 1946 с. төрөөбүтэ. 1968 сыллаахха Дьокуускайдааҕы художественнай училищены живописно-педагогическай салаатын бүтэрбитэ. 1973 сыллаахха А. М. Горькай аатынан литературнай үнүстүүтү бүтэрбитэ. Сэбиэскэй Аармыйа кэккэтигэр сулууспалаабыта. Уус Алдан улууһун хаһыатыгар худуоһунньук-оформителинэн, эппиэттиир сэкэрэтээринэн үлэлээбитэ. Салҕыы П. Ойуунускай аатынан Литература түмэлгэ, «Саха Сирэ», "Забота -Арчы" хаһыаттарга редакциятыгар эппиэттиир секретарь солбуйааччытынан үлэлээбитэ. Бастакы хоһоонноро 1961 сыллаахха бэчээттэммиттэрэ. Хоһооннорун бастакы хомуурунньуга «Аал уоппар итэҕэлим» 1973 сыллаахха күн сирин көрбүтэ. А. Старостин айымньылара республика уонна киин сурунаалларга нууччалыы, о. д. а. омук тылларынан бэчээттэммиттэрэ. Кини хоһоонноругар олоҕуран биллэр сэбиэскэй композитор В. Веселов «Река моя Лена» диэн биэс пастораллаах вокальнай цикл оҥорор. А. Старостин Полтаваҕа буолбут Х-с Бүтүн Холбоһук эдэр хоһоонньуттарын фестивалыгар кыттыбыта. Ытыктабыллаах Анатолий Гавриловиһы Уус Алдан кииннэммит библиотека тиһигин бары үлэһиттэрин уонна ааҕааччыларын ааттарыттан истиҥник эҕэрдэлиибит, бары үтүөнү баҕарабыт.