Атырдьах ыйын 14 күнүгэр Чурапчы улууһун Төлөй-Дириҥэ нэһилиэгэр “Туойдьут Төлөйдөр” бү... — 15 августа 2026 г. в 05:37:58.283
Атырдьах ыйын 14 күнүгэр Чурапчы улууһун Төлөй-Дириҥэ нэһилиэгэр “Туойдьут Төлөйдөр” бүтүн Россия үрдүнэн ыытыллар I бэстибээл бэрт интэриэһинэй, киэҥ программалаах ыытылынна. Ол курдук, умнуллубут төрүт дьарыгы сөргүтэн сири хаһан, уот уматан туой иһиттэри буһардылар, бэстибээл үөрүүлээх аһыллыытыгар “Олох үс кэрчигэ” театрализованнай дьүһүйүүнү көрдөрдүлэр, Андрей Андреевич Саввин “Пища у якутов до развития земледелия” кинигэтинэн астаммыт аһы туой иһиттэргэ буһаран, кутан амсаттылар, туой оҥоһуктары көрүү-конкурс, А.А. Саввин “Гончарное ремесло якутов” кинигэтинэн туой оҥоһугу тута оҥорууга күрэх, маастар-кылаастар, оҕолорго научнай-практическай конференция, “Саха туой оҥоһугун инникитэ” кутаа уот тула аһаҕас кэпсэтии буолла. Бэстибээли ыыталларыгар Төлөй-Дириҥэ нэһилиэк НКО-та “Президенсткий фонд культурных инициатив” Россия граныгар бырайыак суруйан 1000000 солкуобайдаах суумманы ылбыттар, бырайыак ааптара Евдокия Аржакова. Бу бэстибээлгэ Уус Алдан улууһун Суотту нэһилиэгиттэн Антонина Константинова үөрэнээччитинээн Габышева Ариналыын уонна 1 Өспөх нэһилиэгиттэн талааннаах, туойунан 3-с сылын дьарыктанар Оксана Гуляева кытыннылар. 14-17 саастаах оҕолорго “Керамика народов России: прошлое, настоящее, будущее” научнай-практическай конференцияҕа Суотту орто оскуолатын 10 кылааһын үөрэнээччитэ Габышева Арина, салайааччыта Константинова А.Е. 3 миэстэ буолла. Антонина Константинова А.А. Саввин “Гончарное ремесло якутов” кинигэтинэн туой оҥоһугу тута оҥорууга 3 миэстэ, “Ынах сүөһү – саха тыына” керамическай скульптураны оҥоруу көрүҥэр ”Хабыр хапсыһыы” үлэтэ 3 миэстэ, “Саха Дьөһөгөй таҥаралаах” керамическай скульптураны оҥоруу көрүҥэр “Ыһыах мааны ата” үлэтэ “Верность истокам” анал ааты ылла. Оксана Гуляева фестиваль арыйыыта буолла. Кини туойтан оҥорбут сүөһүлэрин, сылгыларын дьон бары хайгыы, сэргии көрдө, талаанын сөхтүлэр. “Ынах сүөһү – саха тыына” керамическай скульптураны оҥоруу көрүҥэр “Наара Суох” үлэтэ “Живая традиция” ана аат, “Саха оҕуһа” үлэтэ 1 миэстэ уонна “Саха Дьөһөгөй таҥаралаах” керамическай скульптураны оҥоруу көрүҥэр “Схватка” үлэтэ 1 миэстэ ылан кыайыы өрөгөйүн биллэ. Бу көрүҥҥэ улууспутугар дьарыктанар киһи аҕыйах да буоллар, бу икки киһибит үрдүк көрдөрүүлэри ситиһэн улуустарын аатын дорҕоонноохтук ааттатан кэллилэр. Өссө да саха төрүт дьарыга туойунан дьарыктанар маастар элбиэн баҕарабыт. ✍🏻 Матрена Герасимова, «Олоҥхо Дьиэтэ» ЭКК специалиһа.