Улуус 20 нэһилиэгэ кыттыылаах, аҕам саастаах көлүөнэ дьон ортотугар ыытыллыбыт “Кэхтибэ...
Улуус 20 нэһилиэгэ кыттыылаах, аҕам саастаах көлүөнэ дьон ортотугар ыытыллыбыт “Кэхтибэт талааннар” бэстибэл түмүктүүр кэнсиэрэ Алдан эбэ хотун мааны кытылыгар уйаламмыт Чэриктэй нэһилиэгин бэтэрээннэрин кэнсиэрин көрүүнэн түмүктэннэ. Кэнсиэргэ барыта 16 бэтэрээн кыттыыны ылла. Саамай аҕам саастаах кыттааччынан буолла 78 саастаах Иван Васильевич Свешников. Чэриктэй нэһилиэгэр кулууп дьиэтэ суоҕа култуурунай тэрээһиннэри ыытыыга, нэһилиэнньэ сынньалаҥын тэрийиигэ улахан мэһэйдэри үөскэтэр. Ол да буоллар олоххо көхтөөх дьоммут Ленинскэй комсомол төрөөбүт күнүгэр түмсэннэр, эдэр саастарын санаан, ансамбылга барыта 15 буолан “Эн комсомол – мин дьолум!” ырыаны доргуччу ыллааннар дипломант аатын сүктүлэр. Онтон сыана бэтэрээнэ Николай Ларионов киһи кутун тутар ырыалардаах Виталий Андросов “Индигиргэ” ырыатын иэйиилээхтик толорон лауреат үрдүк аатын ылла. Уопсай түмүккэ Чэриктэйдэр баллара 4.46 буолла. Бу күн Чэриктэй нэһилиэгин бэтэрээннэрин сэбиэтин бэрэссэдээтэлинэн Бочкарева Варвара Николаевнаны таллылар. 8 сыл бэрэссэдээтэлинэн үлэлээбит Людмила Никифоровнаҕа дьоно-сэргэтэ, үөлээннээхтэрэ махтал истиҥ тылларын анаатылар. Саҥа талыллыбыт састаапка үлэлэригэр ситиһиини баҕардылар.