Бу күннэргэ күүстээх тыаллаах, этиҥнээх ардахтар түһэн хас да сиринэн баһаар күөдьүйэн,... — 18 июня 2026 г. в 06:05:30.625
Бу күннэргэ күүстээх тыаллаах, этиҥнээх ардахтар түһэн хас да сиринэн баһаар күөдьүйэн, айылҕаҕа, дьон олоҕор кутталы суоһатта. Бэс ыйын 17 күнүгэр Даалы бөһүөлэгиттэн 7 км. тэйиччи сиргэ тыа баһаара тахсыбыта бэлиэтэннэ. Баһаар тахсыытын туһунан биллэрии киирээтин кытта, уоту умулларыыга тутатына 21 киһилээх бөлөх уонна 4 тиэхиньикэ үлэлээн, киэһэ 23:00 чааска уот тарҕаныытын тохтоппуттара, бүгүн бэс ыйын 18 күнүгэр күнүс 12:00 чааска баһаары олоччу умуллардылар. Баһаар туохтан тахсыбыта үөрэтиллэр. Маны сэргэ бэс ыйын 18 күнүгэр Найахы нэһилиэгин Балыктаах бөһүөлэгиттэн 11 км. тэйиччи сиргэ эмиэ тыа баһаара тахсыбытын туһунан улуустааҕы ЕДДС иһитиннэрдэ. Баһаары умулларыыга 21 киһи, 3 техника үлэлиир. Куйаас күннэр саҕаланнылар, онон тыаҕа, айылҕаҕа сылдьар дьон сэрэхтээх буоларгыт ирдэнэр. • От-мас, сир кураанах сытар кэмигэр уоту оттор бобуллар! • Табаҕы умулларбакка быраҕымаҥ, уоту күөдьүтүөн сөптөөх малы-салы тыаҕа хаалларымаҥ! • Баһаар тахсыытын көрдөххүтүнэ, тутатына 112 нүөмэргэ эрийэн биллэриҥ. Биир сэрэҕэ суох быһыы, иэдээннээх содулга тиэрдиэн сөп! Дьоммутун-сэргэбитин, айылҕабытын харыстыаҕыҥ! Улуустааҕы ыксаллаах быһыы-майгы хамыыһыйата.