Салгыы улуус баһылыга Василий Алексеев Бэрт Ууһун нэһилиэгэр сырытта. — 25 августа 2026 г. в 12:24:56.775
Салгыы улуус баһылыга Василий Алексеев Бэрт Ууһун нэһилиэгэр сырытта. Манна активы кытта көрсөн үлэни-хамнаһы билистэ. Бөһүөлэк киин уулуссата өрөмүөннэнэн олохтоохтор үөрүүлэрэ үгүс. Сыырдаах орто оскуолата агро-хайысхалаах оскуола статуһун ыларга үлэлэһэ сылдьалларын, итиэннэ "СТК" хампаанньа кэлэн өрөмүөн ыытан, баар итэҕэстэри туората сылдьарын иһитиннэрдилэр. Салгыы баһылык социальнай контрагынан сип-панель оҥоһуутунан дьарыктанар эдэр урбаанньыт Анатолий Копыриҥҥа сырытта. Анатолий бэйэтин бородууксуйатынан улууһу хааччыйан олорорун этэн туран, оҥорон таһаарар кыамтатын улаатыннарар, кэҥэттэр былааннааҕын эттэ. Василий Петрович маннык, бэйэ дьыалатын сайыннарар ыччаттары өйүүр наадатын тоһоҕолоон бэлиэтээтэ. Салгыы 2014 сылтан тэриллэн үлэлиир Даниловтар дьиэ кэргэн хаһаайыстыбаларын сайылыгар сырытта. Хаһаайыстыба үлэһитэ Мария Хабарова быйыл саас улуус баһылыга нэһилиэктэринэн сылдьан билсэр кэмигэр, хаһаайыстыба кэҥээн, эбии саҥа хотоҥҥо наадыйалларын иһитиннэрбитэ. Быйыл СӨ тыатын хаһаайыстыбатын иһинэн үлэлиир кыра кыамталаах эбийиэктэри тутуу бырагыраамманан 50 төбөҕө анаан, саҥа хотон туттан, үлэҕэ киллэрэр былааннаахтар. Удьуор утумуттан тирэҕирбит «Мэкэри» бааһынай хаһаайыстыба сайылыгар сырытта. Хаһаайыстыба салайааччыта Олег Черкашин үлэтин-хамнаһын билиһиннэрдэ. Василий Петрович бэрт тэрээһиннээхтик, сатабыллаахтык тэринэн олороллорун биһирээтэ, атыттарга үтүө холобур буолуохтарын сөптөөҕүн бэлиэтээтэ, инникитин салгыы маннык тэтиминэн үлэлээн, сайдан иһэллэригэр ситиһиилэри баҕарда. Улуус дьаһалтатын пресс-сулууспата.