Бүгүн улуус баһылыга Василий Алексеев Өлтөх нэһилиэгэр сылдьан, үлэни-хамнаһы билистэ. — 25 августа 2026 г. в 11:39:56.061
Бүгүн улуус баһылыга Василий Алексеев Өлтөх нэһилиэгэр сылдьан, үлэни-хамнаһы билистэ. Бэйдиҥэ бөһүөлэгэр национальнай бырайыагынан тутулла турар саҥа врачебнай амбулатория үлэтин хаамыытын көрдө. Амбулатория 140 кв.м. иэннээх, бары ирдэбилгэ эппиэттиир эбийиэги «ИП Иван Пестряков» тэрилтэтэ тута сылдьар. Билигин ис өттүн ситэрии, уотун тардыы, ону таһынан куттал суох буолуутун хааччыйар баһаарынай сигнализацияны туруоруу үлэтэ ыытылла турар. Саҥа эбийиэк былаан быһыытынан, балаҕан ыйын ортото үлэҕэ киириэхтээх. Салгыы баһылык нэһилиэк актыыбын кытта көрсөн, кыһалҕалаах боппуруорстар тула кэпсэттилэр, инники былааннары дьүүллэстилэр. Нэһилиэк баһылыга Константин Алексеев бөһүөлэк иһинээҕи былааннаммыт суол оҥоһуута түмүктэммитин иһитиннэрдэ. Билиҥҥи кэмҥэ буолбут уустук боппуруос, уматык саппааһа баарын үрдүнэн, күннээҕи лимит кырата үлэни атахтыырын бэлиэтээтэ. Арыылаах бөһүөлэгэр уулусса уоттарын саҥардыы үлэтэ түмүктэммитин туһунан, итиэннэ эһиилги дьылга Арылаах бөһүөлэгэ төрүттэммитэ 100 сылын бэлиэтиир боппуруостарга тохтоотулар. Улуус баһылыга сырыытын түмүгэр 7-с нүөмэрдээх баһаарынай чаас эбийиэгэр сырытта. Билигин үлэлии олорор эбийиэктэрэ олох эргэрэн, саҥа депо тутуллара уолдьаспытын бэлиэтээтилэр. Саҥа эбийиэк тутуллуутугар үлэ бэйэлэрин күүстэринэн саҕаламмыт. Ол курдук нэһилиэк дьаһалтатын үбүлээһининэн эбийиэк тутуллар миэстэтэ сиэмэннэнэн бэлэмнэммит. Сорох матырыйааллара таһаҕастанан кэлибиттэр. Тутуу салгыы ыытылларыгар улуус дьаһалтата өйүүрүн биллэрдэ. Улуус дьаһалтатын пресс-сулууспата.