🎊 Бүгүн Саха Өрөспүүбүлүкэтин Национальнай бэчээтин күнүн бэлиэтиир тэрээһиҥҥэ улуус х... — 1 июля 2026 г. в 08:17:00.912
🎊 Бүгүн Саха Өрөспүүбүлүкэтин Национальнай бэчээтин күнүн бэлиэтиир тэрээһиҥҥэ улуус хаһыатын редакциятыгар өр кэмҥэ үлэлээн кэлбит кэллиэгэбитин, улахан уопуттаах биир бастыҥ суруналыыспытын Афанасий Иванович Копырины бочуоттаах сынньалаҥҥа атаарар бэлиэ түгэн буолла. Саха Өрөспүүбүлүкэтин бэчээтин туйгуна, Арассыыйа суруналыыстарын сойууһун Саха сиринээҕи салаатын “Тиэмэҕэ бэриниитин иһин” бириэмийэтин лауреата, Курбуһах нэһилиэгин бочуоттаах олохтооҕо Афанасий Копырин 1999 сылтан улуус хаһыата сайдарын туһугар бэриниилээхтик, үтүө суобастаахтык үлэлээбитин бүгүҥҥү тэрээһиҥҥэ кыттыбыт биир идэлээхтэрэ, редакциябыт бэтэрээн үлэһиттэрэ, Уус Алдан улууһун, Мүрү нэһилиэгин дьаһалталарын, үлэлэспит тэрилтэлэрин салайааччылара уонна аймах-билэ дьоно бэлиэтээн истиҥ эҕэрдэлэрин, махтал тылларын эттилэр уонна наҕараадаларын туттардылар. Онон Афанасий Иванович суруналыыс, кэрэспэдьиэн быһыытынан үйэ чиэппэриттэн ордук кэмҥэ улууспут историятыгар тиһиллэр бэлиэ түгэннэри, күннээҕи олоҕун-дьаһаҕын сырдатыыга, үтүө үлэһит дьонун ааттарын үйэтитиигэ сыралаһан үлэлээбитэ сыаналанан Уус Алдан улууһун “Үлэҕэ килбиэнин иһин” бочуоттаах бэлиэтинэн, “Мүрү нэһилиэгин социальнай-экономическай сайдыытыгар кылаатын иһин”, “Уус Алдан улууһугар култуура сайдыытыгар кылаатын иһин” уонна 2-с Лөгөй нэһилиэгин Кыайыы 80 сылыгар олохтоммут бэлиэлэри тутан үөрүүтэ үрдээтэ. Афанасий Копырин, ардыгар бэйэтэ ылыммыт Афанасий Сектяев диэн псевдонимынан илии баттыыр суруйууларын хаһыаппыт ааҕааччылара бары даҕаны сэргиигит, кэтэһэн, умсугуйан ааҕаҕыт. Бу барыта – кини сылтан сыл тыла-өһө сытыыланан, өйө-санаата кырыыланан, ааҕааччытыгар этэр тыллаах, тиэрдэр санаалаах дэгиттэр суруналыыс буолан тахсан бар дьонун билиниитин ылбытын туоһута. Ытыктыыр киһибитигэр, эдэрдэргэ сүбэ-ама буолар аҕа табаарыспытыгар Афанасий Ивановичка үтүө махтал тылларын анаан туран, өрүү чэгиэн буолууну, мантан ыла айар аартыгыҥ өссө арыллан иһэригэр, чугас дьонуҥ этэҥҥэ буолан, дьоллоохтук, уһуннук олороргор баҕарабыт. 📲Мах-каналбытыгар сурут ⬇️ https://max.ru/join/3C9ZQLhT3NOAcTqvoqV7q1JihA40sSL8ZGoFY5jwqMU 🌐мюрюгазета.рф ✅ @uamurusahargata @ulusmedia