Бүгүн билии күнүгэр улуус баһылыга Василий Алексеев В.Ф. Афанасьев - Алданскай аатынан ... — 1 сентября 2026 г. в 14:41:33.298
Бүгүн билии күнүгэр улуус баһылыга Василий Алексеев В.Ф. Афанасьев - Алданскай аатынан орто оскуола үөрүүлээх линейкатыгар кыттыыны ылла. Үөрүүлээх күҥҥэ оскуола дириэктэрэ Лена Ефремовна Лугинова үөрэх дьыла саҕаламмытынан эҕэрдэлээн туран, ааспыт сыллааҕы үлэ көрдөрүүлэрин иһитиннэрдэ. Ааспыт үөрэх дьылыгар оскуоланы 3 оҕо бүтэрбититтэн, икки оҕо үрүҥ көмүс мэтээлинэн наҕараадаламмыттар. Маны таһынан учуутал сыралаах үлэтин сыаналаан, ааспыт сылтан бастыҥ көрдөрүүлээх педагогтарга бириэмийэни туттарыы үтүө үгэскэ кубулуйан, бүгүн үөрүүлээх быһыыга-майгыга туттарылынна. Улуус баһылыга Василий Алексеев оҕолор билиигэ-көрүүгэ тардыһыылаах, төрөөбүт дойдуларыгар бэриниилээх, үтүө майгылаах, үлэһит дьон буолан тахсалларыгар салалта өттүттэн, сөптөөх усулуобуйаны тэрийиигэ, итиэннэ хас биирдии оскуола, уһуйаан материальнай-техническэй баазатын хаҥатыыга, учууталлар идэлэрин таһымын үрдэтиигэ тиһигин быспакка ыытылларын этэн туран саҥа үөрэх дьыла хас биирдии үөрэнээччигэ саҥа арыйыылары, үрдүк ситиһиилэри аҕаллын диэн баҕа санаатын тиэртэ. «Өксөкү сиэннэрэ (Орлята России)» федеральнай бырагырааммаҕа кыттар оҕолорго уонна кинилэр учууталларыгар бэлэхтэри туттарда. Чэриктэй орто оскуолатыгар быйыл маҥнайгы кылааска алта кырачаан оскуола боруогун атыллаата. Кинилэри маҥнайгы учууталлара Дария Дмитриевна Егорова көрсөн, маҥнайгы уруоктарын ыытта. Улуус дьаһалтатын пресс-сулууспата.