Бүгүн Уус Алдан улууһугар Арассыыйа Дьоруойа, хорсун буойун Андрей Николаевич Григорьев...
Бүгүн Уус Алдан улууһугар Арассыыйа Дьоруойа, хорсун буойун Андрей Николаевич Григорьев - Тута кэргэнинээн Октябрина Дмитриевналыын ыалдьыттаата. Дьоруойу улуус баһылыга Василий Алексеев, анал байыаннай дьайыы кыттыылаахтара, бойобуой доҕотторо Тойон Мүрү аартыгар, Хараҕа Төрдүгэр айах тутан көрүстүлэр. Салгыы байыаннай дьайыы кыттыылаахтарын үгэһинэн кыргыһыы толоонугар дьоруойдуу охтубут буойун Василий Данилов пааматынньыгар тохтоон, кэриэстээн аастылар. "Түһүлгэ" сынньалаҥ киинигэр бойобуой доҕотторун кытта итии чэйдээх остуол тула олорон билистилэр, кэпсэттилэр, санаа атастастылар. Улуустааҕы байыаннай дьайыы кыттыылаахтарын түмсүүтүн салайааччыта Андрей Карпов өйдөбүнньүк бэлэх туттарда. Андрей Николаевич «Швейный патриот» уонна анал байыаннай дьайыы киинин волонтердарын үлэлэрин кытта билистэ. Салгыы Олоҥхо дьиэтигэр «Көлүөнэ ситимэ» норуот педагогикатын сугулааныгар кыттыыны ылла. Манна кини бойобуой сырыыларын кэпсээтэ, "Дьон, норуот ис сүрэҕиттэн оҥорон ыытар кэһиилэрэ, суруктара, оҕолор уруһуйдара байыаннай дьайыыга сылдьар хас биирдии саха буойунун долгутар, уоскутар" - диэн бар дьонугар махталын тиэртэ, итиэннэ сэрии түмүктэнэн уолаттарбыт кыайыы көтөллөөх кэлэллэригэр баҕа санаатын тиэрдэн туран, "Сэрии алдьархайын, эрэйи-муҥу көрөн, уйулҕалара ыһыллыбыт дьон кэлиэхтэрин сөп, онно биһиги бары дьулуурдаахтык тулуйан, көмөлөһөн, бигэ тирэх буолуохпутун наада" - диэн санаатын эттэ. Мүрүтээҕи уолан гимназияҕа көрсүһүү ыытылынна. Андрей Николаевичка уолан гимназия дириэктэрэ Валерий Рожин гимназия үлэтин-хамнаһын, уратытын билиһиннэрдэ. Уоланнар Дьоруойга интэриэһиргиир боппуруостарын биэрэн аһаҕас кэпсэтиини таһаардылар. Түмүгэр уоланнарга «Хаһан да, ханна да сырыттаргыт, ийэ тылгытын умнумаҥ, төрүт үгэһи тутуһуҥ, сиргитин-уоккутун аһата сылдьыҥ», - диэн туһаайан эттэ, итиэннэ Эр киһи буолар аналгытын билиҥҥиттэн саҕалаан, дьиэ кэргэн аҕа баһылыга, Ийэ дойдуга бэриниилээх, Саха сирин сарсыҥҥытын салайсар, булгуруйбат санаалаах эр хоһууттара буолан тахсалларыгар алгыһын анаата. Улуус дьаһалтатын пресс-сулууспата. 📹 Юрий Стручков
Канал в каталоге Максиметера
502 подписчиков · Госорганы и учреждения