Ыам ыйын 15 күнүгэр Матвей Николаевич Турнин аатынан Тыараһа орто оскуолатыгар Арассыый... — 15 мая 2026 г. в 11:53:08.015
Ыам ыйын 15 күнүгэр Матвей Николаевич Турнин аатынан Тыараһа орто оскуолатыгар Арассыыйаҕа норуоттар сомоҕолоһууларын сылыгар, Саха Сиригэр культура сылыгар анаммыт бүтүн Арассыыйатааҕы «Оҕо саас сирдьиттэрэ» бырагыраамма чэрчитинэн үлэлиир алын кылаас оҕолорун – «Өксөкү сиэннэрэ» хамсааһын улуустааҕы слета Таатта улууһугар аан маҥнайгытын ытылынна. Тыараһа орто оскуолата 2022 сыллаахтан «Өксөкүлээх үөрэҕэ» бырайыагынан (ааптар Екатерина Петровна Чехордуна, «Өксөкү сиэннэрэ» бырагыраама научнай сүбэһитэ, педагогика билимин хандьыдаата, этнопедагог) үлэлиир оскуола. Алексей Елисеевич Кулаковскай – Өксөкүлээх Өлөксөй 3 сааһыттан 9 сааһыгар диэри Тыараһа нэһилиэгэр эһэлээх эбэтигэр иитиллибит, оҕо сааһа ааспыт сирэ буолар. Онон «Өксөкү сиэннэрэ» слет Тыараһа орто оскуолатыгар ыытыллыбыта олус суолталаах буолла. Слет кыттыылаахтарын Өксөкүлээх Өлөксөй аатынан өйдөбүнньүк сквергэ көрүстүлэр. Скверга сылдьан оҕолор кини Тыараһаҕа олорбут оҕо сааһын кэмин туһунан иһиттилэр, билиилэрин хаҥаттылар. Слекка Тааттабыт улууһун 9 оскуолатыттан – 10 хамаанда кэлэн 7 трегынан араас сорудахтардаах, интэриэһинэй ис хоһоонноох түһүмэхтэринэн күрэхтэстилэр. Күрэх түмүгэ: • «Киэҥ билиилээх» анал ааты ыллылар Владимир Ильич Ленин аатынан Уолба орто оскуолатын «Ыллык» хамаандата; • «Уран уус» анал ааты ыллылар Авксентий Егорович Мординов аатынан Тааттатааҕы лицей «Өксөкүчээннэр» хамаандата; • «Айылҕаны харыстааччы» анал ааты ыллылар Алексей Елисеевич Кулаковскай – Өксөкүлээх Өлөксөй аатынан Дьохсоҕон орто оскуолатын «Сандаар» хамаандата; • «Басхан» анал ааты ыллылар Анемподист Иванович Софронов - Алампа аатынан Ытык-Күөл бастакы нүөмэрдээх орто оскуолатын маҥнайгы «Пиксельная семерка» хамаандата; • «Бэйэ баҕатынан көмөлөһөөччү» анал ааты ыллылар Эдуард Карлович Пекарскай аатынан Игидэй орто оскуолатын «Орлята» хамаандата; • «Эрчим» анал ааты ыллылар Анемподист Иванович Софронов - Алампа аатынан Ытык-Күөл бастакы нүөмэрдээх орто оскуолатын иккис «Хардыы» хамаандата; • «Историяны харыстааччы» анал ааты ыллылар Иннокентий Михайлович Хатылаев аатынан Баайаҕа орто оскуолатын «Орлята» хамаандата; • 2-3 миэстэни ыллылар Серафим Романович Кулачиков – Эллэй аатынан Чычымах орто оскуолатын «Крылья России» хамаандата; • 2-3 миэстэни ыллылар Дмитрий Ананьевич Петров аатынан Ытык-Күөл иккис нүөмэрдээх орто оскуолатын «Албан» хамаандата; • 1 миэстэни ыллылар Матвей Николаевич Турнин аатынан Тыараһа орто оскуолатын «Өрүөлчээннэр» хамаандата. 1, 2, 3 миэстэни ылбыт хамаандалар улуус чиэһин көмүскүү Илин эҥэрдээҕи «Өксөкү сиэннэрэ» слекка Уус Алдан улууһун Бэйдиҥэ орто оскуолатыгар ыам ыйын 20 күнүгэр барыахтара. Оҕолор бэйэлэрин тургутан, билиилэрин хаҥатан, доҕордоһон үөрэн-көтөн тарҕастылар. Оҕолорбут бүгүн өрүөлчээннэр, сарсын өрүөллэр буолан, дойдуларыгар бэриниилээх дьон буолан тахсарга үөрэнэллэр. Хас биирдии киһи улууһун, нэһилиэгин историятын, оскуолатын олоҕун-дьаһаҕын үөрэтиэхтээх, билиэхтээх. Онтон саҕаланар оҕону патриотическай тыыҥҥа иитии, дойдуга тапталы иҥэрии. Кыттыыны ылбыт, ситиһиилэммит бары хамаандаларга өссө төгүл эҕэрдэлээн туран, инникигэ эрчимҥитин ыһыктыбакка, эрэлгитин сүтэрбэккэ, дьаныардаахтык дьарыктанан, үрдүктэн үрдүк ситиһиилэри дабайын диэн баҕарабыт!