СВО кыттыылаахтарын боппуруостарынан бу нэдиэлэҕэ Хабаровскайга үлэлээтим. — 16 апреля 2026 г. в 14:06:39.172
СВО кыттыылаахтарын боппуруостарынан бу нэдиэлэҕэ Хабаровскайга үлэлээтим. Бүгүн биир дойдулаахпын, Мэҥэ Хаҥалас Хара нэһилиэгиттэн төрүттээх Алена Лебедкинаны кытта көрустум, дьиэтигэр ыалдьыттаатым. Алена Васильевна кэргэнинээн Алексей Валерьевичтыын, бүтүн ыалынан, 2022 сыл олунньутуттан волонтер быһыытынан үлэлии-хамсыы сылдьаллар. Күннэтэ Саха сириттэн сылдьар анал байыаннай дьайыы кыттыылаахтарыгар, срочник саллааттарга, кинилэр аймахтарыгар көмөлөһө олороллор. Ол курдук, ыарахан операция кэннэ госпитальга эмтэнэ сылдьар уолаттарга ас астаан илдьэллэр, срочник саллааттар кыһалҕаларын быһаарсаллар, быраас хамыыһыйатын ааһа кэлбит байыастары, саллааттар ийэлэрин, чугас дьоннорун көрсөн, хоннортоон, суолларыгар көмөлөһөн күннэтэ түбүгүрэллэр. Амарах санаалаах дьиэ кэргэн, Хабаровскай кыраай араас муннуктарыгар баар байыаннай чаастарынан эрэ муҥурдаммакка, Амурскай, Сахалин уобаластарыгар баар чаастарга тиийэ сылдьаллар. Үс төгүл анал байыаннай дьайыы буола турар сиригэр тиийэ сылдьыбыттаахтар. Биир сырыыларыгар сураҕа суох сүппүт саха уолун госпитальтан булан, дойдутугар кэлэригэр көмөлөспүттээхтэр. Дойдугуттан атын сиргэ тиийэн үгүс киһиэхэ көмөлөһөр, кыһалҕатын быһаарсар манан дьыала буолбатах. Биир дьиэ кэргэн сүнньүгэр үп-харчы өттүнэн олус ыарахан. Аҥардас байыаннай чаастар хас биирдиилэрэ ыраах сытар буоланнар суолга-иискэ даҕаны үгүс үп баранар. Ону ол диэбэккэ, Лебедкиннар, күүстээх санааларынан, эппиэтинэс ылынан күннэтэ биир дойдулаахтарыгар күүс-көмө буола тураллар. «Тохтоон хаалыахпытын, суобаспыт оонньуур, аҕыйах күҥҥэ даҕаны дойдубутугар бараары гыннахпытына сүтэрэллэр, ыраахтан даҕаны, төлөпүөн нөҥүө кыһалҕалары быһаарса турабыт», – диэн кэпсиир ыал ийэтэ Алена. Биллэн турар, Саха сиригэр олорор биир дойдулаахтарын көмөтө суох хайдах да кыаллыбат дьыала. Алена Васильевна үтүө дьыалаҕа көмөлөрүн иһин, Өрөспүүбүлүкэ Ил Дарханыгар Айсен Сергеевичка, Мэҥэ Хаҥалас улууһун баһылыгар Дмитрий Ивановичка, нэһилиэк баһылыктарыгар, «Серебряные волонтеры» хамсааһыҥҥа уонна биирдиилээн күүс-көмө буолар дьоҥҥо улахан махталын биллэрэр. Сайаҕас, сайдам санаалаах Лебедкиннар дьиэ кэргэҥҥэ бу курдук ыалдьыттаан, дьиэ сылаас аһын аһаан, ирэ-хоро кэпсэтэн таҕыстым. Хас биирдиибит туора турбакка биир дойдулаахтарбытыгар күүс-көмө, өйөбүл буола туруоҕуҥ, күүстээх санаалаах дьоммутун туох кыалларынан өйүөҕүҥ!