Күндү биир дойдулаахтарым, быыбардааччыларым, бар дьонум! — 8 сентября 2026 г. в 01:51:20.499
Күндү биир дойдулаахтарым, быыбардааччыларым, бар дьонум! Аҕыйах хонугунан олус суолталаах хардыыны оҥороору олоробут – балаҕан ыйын 18-19-20 күннэригэр дойдубут Судаарыстыбаннай Дууматыгар өрөспүүбүлүкэбитин сирэйдиэхтээх дьокутааттары талыахпыт. Өрөспүүбүлүкэбит, дойдубут дьылҕата быһаарыллар быыбарыттан туора туран хаалымаҥ, бэйэбит уолбутугар – Петр Витальевич Шамаевка – куоластааҥ. “Тоҕо ала-чуо киниэхэ?” диэххит. Тоҕо диэтэххэ, Петр Витальевич олох эт-хаан бэйэбит киһибит. Кини сымнаҕас олбохтоох кэбиниэттэн-кэбиниэккэ көһө сылдьан үлэлээбит, ким эрэ билсиитинэн миниистир буолбут, куорат таас дьиэлэрин быыһыгар үөскээбит киһи буолбатах. Кини – эн биһикки курдук. Бостуук аҕаттан, ыанньыксыт ийэттэн төрөөбүт, дэриэбинэ буордаах суолугар оонньоон улааппыт, ыарахан үлэ диэни кыратыттан билбит киһи. Бүөккэ сииктээх сарсыарда токур хотуур оту охсон лыҥкынатар тыаһын, үлэлээн-хамсаан бардахха кыраабыл-атырдьах уга хайдах күөрэҥниирин, уйгу-быйаҥ өҥ буортан кэлэрин бэркэ билэр. Кини хаһан даҕаны үлэттэн кыбыстыбат, толлубат, кинини күүстээх үлэ уонна Сахабыт сирин тыйыс айылҕата уһааран, киһи гынан таһаарбыта. Бүгүн Петр Шамаев – сатабыллаах, лоп бааччы толкуйдаах салайааччы, миниистир. Ол гынан баран, кини тыа киһитин боростуой майгытын, үлэһит хаачыстыбатын күн бүгүнүгэр диэри ыһыктыбакка илдьэ сылдьар. Кини кыһыҥҥы бытархан тымныыга тыа сиригэр олорор хайдаҕын, кэмигэр холбонор ититии, уот тыын суолталаахтарын, суол-иис, сүөһүлээх-астаах дьон күннээҕи кыһалҕатын олус үчүгэйдик билэр. Кини бэйэ Киһитэ, дьиҥнээх Патриот. Ийэ дойдубутун көмүскүүр күн тирээн кэлбитигэр, Петр Витальевич бэйэтин үтүө баҕатынан анал байыаннай дьайыыга барбыта, саа-саадах туппута уонна эркин курдук эрэнэр доҕотторунуун, дьиҥнээх саха боотурунуу эрдээхтик сулууспалаабыта. Ыарахннык бааһырыыта даҕаны кини санаатын, кутун-сүрүн самнарбатаҕа! Сэрии будулҕаныттан тыыннаах эргиллэн, чөлүгэр түһэн баран, эмиэ үлэ-хамнас инники кирбиитин кэккэтигэр эрэллээхтик турбута. Тостубатаҕа, ол оннугар төрөөбүт, тапталлаах Сахатын сирин туһугар икки бүк күүстээх үлэни саҕалаабыта. Дьиэтигэр эргиллэн да баран, Петр окуопаҕа бииргэ сыппыт, хорсун доҕотторум умнубат. Хас биирдиилэрин өйдүүр, күн бүгүн саа-саадах тутан инники кирбиигэ эрдээхтик киирсэр байыастары кытта күннэтэ билсэ олорор, мэлдьи көмөлөһөр. Мин билэбин уонна итэҕэйэбин: Петр Шамаев курдук киһи таҥнарар диэни билбэт. Эйэлээх олоххо даҕаны биһигини, биһиги ыччат дьоммутун умнуо суоҕа. Кини илиитин ыһыктыбакка үлэлиэ-хамсыа. Хайдахтаах да уустук соруктартан куттаныа, чаҕыйыа суоҕа. Тоҕо диэтэххэ, кини кыайа үөрэммит киһи – бэйэтин, үлэни уонна олоҕу. Онон биһиги накааспытын Москубаҕа тиийэ булгуччу тиэрдиэҕэ, туруулаһыаҕа, ситиһиэҕэ. Петр Шамаевы өйүөҕүҥ! Быыбарга кэлиҥ, тыа сириттэн силистээх-мутуктаах бэйэбит уолбутугар, дьиҥнээх патриокка, эрдээх сүрэхтээх Петр Шамаевка куоластыаҕыҥ. Бары бииргэ Сахабыт сирин, Модун Россия туһугар үлэлиэҕиҥ! #ЕдинаяРоссия #ПетрШамаев