Еттык, тумгытури!
Еттык, тумгытури! Үтүө күнүнэн! Үнүр ситимнэрбэр ахтан аһарбытым курдук, “Эргав” диэн – Чукотка автономиялаах уокуругар ыытыллар, номоххо киирбит фольклор бырааһынньыга. Фестиваль быйыл үбүлүөйүн бэлиэтиир – 30-с сылын ыыталлар! Биһигини, Саха сирин уонна Камчатка айар үлэһиттэрин, манна ыалдьыт быһыытынан ыҥырдылар. Биһиги үөрэхпит кыһата, Күн Өркөннөр, ыҥырыыбытын өссө саас туппуппут. Онтон ыла бэлэмнэнэн, ох курдук оҥостон кэллибит. Саха сириттэн тохсуобут: аҕыс уһуйааччы уонна биир устудьуон. Сүрүн сорукпут – Чукотка олохтоохторугар уонна фестиваль кыттыылаахтарыгар фольклор араас жанрыгар маастар-кылаастары ыытыахтаахпыт. Саханы саха дэппит ырыабытын-тойукпутун, оһуохайбытын-чабырҕахпытын көрдөрүөхпүт. Ону таһынан кэллиэгэлэрбит маастар-кылаастарыгар сылдьан, атын омук культуратын уратытын бэйэбит эмиэ иҥэриниэхпит. Бүгүн тэрээһиммит арыллыыта дьэ буолар! Анаан бэлиэтээн эттэххэ, айан-сырыы, хонук сир, аһааһын соболоңун бүтүннүү чукча-эскимос номоххо киирбит судаарыстыбаннай ансаамбыла – “Эргырон” – уйунна. Биһиги кинилэри кытта доҕордоспуппут ыраатта – урут икки төгүл кинилэри Саха сиригэр ыалдьыттатан, көрсөн турабыт. Оттон быйыл кинилэр биһигини аата-суола Чукотканы уҥуордаан аан дойдуга биллибит “Эргавтарыгар” ыҥырдылар. Уһук Илин биир саамай биллэр уонна кырдьаҕас фестивалын илэ көрөр, төрүт культурабытыттан уопуппутун үллэстэн кыттар кыах биэрбиттэригэр – барҕа махтал буоллун! Кыратык айан-суол туһунан Дьокуускайтан Анадырьга тиийэр, чахчы, судургута суох дьыала эбит! Ыллыҥ да көтөн тиийэр рейсэ да, кыах да суох. Дьиҥэр, Саха сириттэн Певеккэ көтөн тиийиэххэ сөп эрээри, онтон сатыы да, тиэхиньикэ да сылдьыбат халыҥ тайҕатын-хайатын уҥуордаан Чукотка биир уһугар – Анадырьга тиийэр – туспа остуоруйа. Санамматах да ордук. Саатар, Певекка диэри билиэт Чукотка бэйэтин эрэ олохтоохторугар субсидиялаах. Онон биһиги хас да хайысханы толкуйдаан баран, айан кэмин кэмчилиир туһугар, Москуба нөҥүө көттүбүт. Өссө бу түгэҥҥэ “кэмчилээн” диэн арыый баһыы курдук. Син биир суукка кэриҥэ айаннаатыбыт. Онон ким эмэ алҕас бу эҥээр кэлэр буоллаҕына, “суолу-ииһи эрдэттэн учуоттуохха наада эбит” диэн сүбэлиибин. Ол да буоллар, кэлбиппитин кэмсиммэтибит! “Эргавтан” Э5ЭРДЭ! Көрсүөххэ диэри – А’тав, тумгытури! P.S: Манна бириэмэ биһигиттэн үс чаас эрдэлээн иһэр, онон олох эрдэһит буола сылдьабыт!) #Эргав #Чукотка #Якутия #Сахасирэ #Фольклор #КүнӨркөн #КолледжКультуры #Эргырон #Анадырь