ХХ пленарнай мунньахха тус бэйэм өттүбүттэн “Саха Өрөспүүбүлүкэтин үтүөлээх худуоһунньу...
ХХ пленарнай мунньахха тус бэйэм өттүбүттэн “Саха Өрөспүүбүлүкэтин үтүөлээх худуоһунньуга” туһунан сокуон иккис аа5ыыны ааста, ылылынна! Билигин Саха сиригэр 130-тан тахса идэтийбит худуоһунньук баар. Өссө сүүһүнэн оҕо идэтийбит үөрэх кыһаларыгар, оннооҕор элбэх ыччат Сахабыт сирин былаһын тухары оҕо искусствотын оскуолаларыгар үөрэнэр. Худуоһунньук үлэтэ-хамнаһа кэми-кэрдиини, ханнык да кыраныыссаны, бэлиитикэни, ырааҕы-чугаһы билиммэт. Кинилэр киһи тириитин өҥүттэн, тылын-өһүн, омугун-норуотун уратытыттан тутулуга суох аан дойдуну кытта искусство, культура биир тылынан кэпсэтэллэр, сүүһүнэн норуоттар сыһыаннарыгар искусство доҕордуу далаһатын кэбиһэр кыахтаахтар. Онон сокуон ылыныллыбытыгар кэллиэгэлэрбэр, норуот дьокутааттарыгар, истиҥ махталбын тиэрдэбин! Бу Саха Өрөспүүбүлүкэтигэр Культура сылыгар олус үчүгэй уонна инникитин баар-суох худуоһунньуктарбытын өйүүргэ, кинилэр ааттарын, культура-искусство эйгэтигэр, онон сэдиптээн норуоттарын бүттүүн сайдыытыгар киллэрбит кылааттарын сиэрдээхтик сыаналыырга улахан көдьүүстээх саҕалааһын буолуо диэн эрэнэбин. Манна даҕатан эттэххэ, бу сааскы сиэссийэҕэ өссө биир сокуон ылыллыбыта. Ол – судаарыстыбаннай уонна муниципальнай культура тэрилтэлэрин айар үлэһиттэрин биир сыллаах айар уоппускаларын туһунан сокуон. Судургутук эттэххэ, айар дьон – артыыстар, музыканнар, худуоһунньуктар, кулууп, бибилэтиэкэ-музей үлэһиттэрэ – үлэлэриттэн уурайбакка, миэстэлэрин хаалларан туран, 10 сылга биирдэ уһун уоппусканы ылыахтарын сөп буолла. Ол туохха нааданый? Ол барыта культура эйгэтин үлэһиттэрэ “үлэбиттэн ууратыахтара, хамнаһа суох хаалыам” диэн куттаммакка эрэ, айар бырайыактарынан дьарыктаналларын, араас бэстибээллэргэ, киинэ бырайыактарыгар кытталарын, идэлэрин таһымын, айар-тутар сатабылларын үрдэтэллэрин туһугар оҥоһулунна. Ону таһынан, биир сыллаах уоппуска сүрүнэ диэн, культура эйгэтин дьоно түбүктээх үлэҕэ сылдьан “умайан” хаалбаттарын, өссө саҥалыы кынаттанан, айар идиэйэлэрдэнэн үлэлииллэрин-хамсыылларын хааччыйар соруктаах. Өйдүүргүт буолуо, итинник айар уоппускаҕа-айаҥҥа урут суруйааччылар сылдьар буолаллара. Эрилик Эристиин, Софрон Данилов, о.д.а. саха бөдөҥ суруйааччыларын норуот өйүгэр-санаатыгар хаалбыт сүдү айымньылара ити курдук айар уоппуска кэмигэр суруллубуттара, айыллыбыттара. Билигин итинник практика үөрэх эйгэтин үлэһиттэригэр туттуллар. Сокуон бырайыага иккис ааҕыыны ааһан, аны 2027 с. тохсунньу 1 күнүттэн күүһүгэр киириэхтээх. Ол барыта культура эйгэтигэр талааннаах исписэлиистэри тутан хааларга, идэлээх ыччаты угуйан аҕаларга тирэх буолуохтаах. Онон культура эйгэтигэр туһааннаах сокуоннар ылыллыбыттарыгар кэллиэгэлэрбэр, дьокутааттарга, бу Культура сылыгар культура үлэһиттэригэр болҕомтоҕутун ууран өйөөбүккүтүгэр ис сүрэхтэн махтанабын. Тус бэйэм улахан махталбын сокуону оҥорууга быһаччы үлэлэспит үтүө дьоммор – Ил Түмэн старшай референэ Семен Карлович Григорьевка, Культура идэлээх сойууһун салайааччытыгар Анастасия Ивановна Самсонова5а – дириҥ махталбын этэбин! Инникитин даҕаны үлэбит таһаарыылаах, бар дьоммут туһугар үтүө түмүктээх буоллун! Хаартыска5а: Анастасия Ивановналыын.