Үйэ аҥаара культура туһугар: номоххо киирбит отделениебыт үбүлүөйэ
Үйэ аҥаара культура туһугар: номоххо киирбит отделениебыт үбүлүөйэ Быйыл биһиги биир суолталаах даатаны бэлиэтиибит – А.Д. Макарова аат. Культура уонна искусство колледжын иһинэн “Организация и постановка культурно-массовых мероприятий и театрализованных представлений” салаа тэриллибитэ 50 сылын! Бу отделение историята – өрөспүүбүлүкэбит культуратын историятын быстыбат сорҕото буолар. Ааспыт үйэ 1976 с. оччотооҕу Кульпросвет училище иһинэн аан бастакытын “Режиссура клубных мероприятый” салаа арыллыбыта. Ол акылаатын биһиги уһулуччулаах педагогтарбыт И.И Бурцев, А.И Васильев, А.Б. Тё, Р.Д Попова, Л.А Егорова, А. И Платонова түстээбиттэрэ. Онтон 1978 с. отделение номнуо өрөспүүбүлүкэ араас муннугар культура уонна искусство сырдатар уотун тарҕатыахтаах бастакы хараҥаччыларын көтүппүтэ. Онтон бэттэх үйэ аҥаара ааста. Бу кэм иһигэр отделение хас эмэ көлүөнэ талааннаах профессионалы иитэн таһаарбыт культура эйгэтин дьиҥнээх кыһата буолла. Биһиги выпускниктарбыт – дэгиттэр дьоҕурдаах тэрийээччилэр, сыана уһулуччулаах маастардара – күн бүгүн тыа сирин кулууптарыттан саҕалаан Сахабыт сирин бөдөҥ тыйаатырдарыгар, үөрэҕин кыһаларыгар үлэлии-хамсыы, айа-тута сылдьаллар. Кинилэр дэриэбинэ сэмэй бырааһынньыктарыттан саҕалаан Туймаада Ыһыаҕа, “Азия оҕолоро” курдук уо.д.а. сүүһүнэн тыһыынча киһини түмэ тардар норуоттар икки ардыларынааҕы түһүлгэлэри чочуйан таһаараллар. Онно барытыгар идэлэрин дэгиттэрдик, дьиҥнээх профессионал таһымыгар баһылаабыттара, айар-тутар уохтара, бэйэ дьыалатын, талан ылбыт идэлэрин муҥура суох таптыыллара дьэҥкэтик көстөр. Биир да культура-искусство, тыйаатыр, бэл, успуорт тэрээһинэ биһиги выпускниктара суох ааспат. Ураты махтал тылы бу күн саҕалаабыт дьоҥҥо, биһиги бастакы хараҥаччыларбытыгар этэбит. Кинилэр күн бүгүн да өрөспүүбүлүкэбит чэчирии сайдарыгар кылааттарын киллэрэ, айа-тута сылдьаллар. Кинилэр Саха сирин культурнай кодун оҥороллорун таһынан, баай уопуттарыттан ыччакка үллэстэллэр, сатабылларын-билиилэрин көлүөнэттэн-көлүөнэҕэ тиэрдэллэр. Кинилэр идэлэригэр бэриниилэрэ – биһиэхэ бастыҥ холобур. Бу туран кэннибитин хайыһан көрдөххө, бу барыта биһиги педагогтарбыт уонна наставниктарбыт арыт түүнү-күнү умнар сыралаах, кыһамньылаах үлэлэрин түмүгэр ситиһиллибитин өйдүүгүн. Олор ортолоругар биир улахан, бочуоттаах миэстэни билигин колледжып аатын кытта утум-ситим дорҕоонноохтук ааттанар Аграфена Дмитриевна Макарова аата ылар. Кини салалтатынан 90-с сс. училищебыт колледж буолбута, саҥа идэлэр, ураты тыыннаах айар кэлэктииптэр баар буолбуттара. Оттон 2016 с. култуура үтүөлээх үлэһитэ О.А. Стручкова, А.А Константинов кыһамньыларынан “Истории нашей верны...” кинигэ күн сирин көрбүтэ, онно тыыннаах летопись буолан отделение бары көлүөнэ выпускниктарын ахтыыта киирэн кичэллээхтик тиһиллибитэ. Киһи үөрэрэ-астынара диэн, үбүлүөй Саха сиригэр Культура, Россияҕа Норуоттар сомоҕолоһууларын сылыгар бэлиэтэнэр. Оттон культура уонна искусство диэн, бу – норуоттары уонна дьону түмэр, кыраныыссаны суурайар, өйдөһүү, тыыннаах диалог эйгэтин тэрийэр сүдү күүс. Онон биһиги вупускниктарбыт сыралаах үлэлэрэ – культура диэн норуот дууһатын сиэркилэтэ, илэ-чахчы тыыннаах тыла буоларын туоһута. Алтынньы 24 күнүгэр “Сэргэлээх уоттара” КК бу бэлиэ даатаҕа анаммыт дьоро тэрээһин буолла. Саалаҕа бэтэрээннэрбит, уһуйааччыларбыт, устудьуоннарбыт, араас сыллардааҕы выпускниктарбыт муһуннулар, үгүс үтүө тыл иһилиннэ, махтал этилиннэ. Түгэни туһанан өссө төгүл эҕэрдэлиибин! Саҥаттан-саҥа айымньылаах кыайыылары, иэйиини, уостубат эрчими уонна махталлаах көрөөччүнү баҕарабын! Эһиги үлэҕит өрөспүүбүлүкэбит, дойдубут туһугар омуктары-норуоттары түмэ, сомоҕолуу турдун! Мин бэйэм эмиэ бу салаа выпускнига буолан үөрэппит учууталларбар махталым муңура суох.