💥22 дугаар школада Билиглер хүнү
💥22 дугаар школада Билиглер хүнү 📢Кызыл хоорайның Д.Б. Ондар аттыг 22 дугаар школазы эрткен чылын Билиглер хүнүнде байырлыг байдалга ажыттынган. Келир үениң инженерлерин, программистерин болгаш өске-даа техниктиг ажылдакчыларын белеткээр инженер-техниктиг угланыышкынныг школага Тыва АССР-ниң Чырыдыышкын яамызының сайыды Дөжүлдей Бүрзүнеевич Ондарның адын тывысканын билир бис. Бо чылын чаа школа ийи дугаар Билиглер хүнүн демдеглеп эрттирип турар. Сентябрь 1-де болган байырлыг чыскаалга үш-үш 10 болгаш 11 класстарның өөреникчилери база школаның эргинин бир дугаар артап турар бирги классчылар чыскаалган. «Мөңгүн» микрорайонунда чурттап турар хензигбейлер мырыңай 7 класс кылдыр бижиттирип, өөренип кирип турар. Байырлыг хемчегни 10«б» класстың өөреникчилери башкарып, школаның чаа директорун таныштырган. ТР-ниң өөредилге сайыдының хүлээлгезин күүседип турган Орлан Соян школаның удуртукчузу болган. Ол уругларга, ада-иелерге, коллективке чаа өөредилге чылының эгези болгаш Билиглер хүнү-биле байырын чедирген. Хемчегниң хүндүлүг аалчылары: Тываның прокурорунуң бирги оралакчызы Владимир Большунов, Кызыл хоорайның Төлээлекчилер хуралының депутады Чингиз Алиев, Кызыл хоорайның Өөредилге департаментизиниң кижизидилге болгаш немелде өөредилге килдизиниң начальниги Юлия Тумайкина болгаш Ада-чурт камгалакчызы, тускай шериг операциязында киржип турар ада-ие Георгий Ондар – школаның доозукчуларынга, бирги классчыларга чаа өөредилге чылында хемчеглерге идепкейлиг киржип тургаш, хөй-хөй чедиишкиннерлиг, тиилелгелерлиг болурун күзээннер. Кижиниң амыдыралында школачы чылдары дег уттундурбас, онза үе чок. Ылаңгыя бирги классче өөренип кирип турганын кажанда-даа утпас болур. Шынап-ла, чугаазы ам-даа чассыг хевээр курзукпайлар школаже өөренип кирип, билиглерже баштайгы базым кылып турарынга өөрүп, шүлүктээрге, доозукчулар дуңмаларынга саазындан кылган ужар-хемелерни белекке сөңнээн. Директорнуң кижизидилге талазы-биле чөвүлекчизи Марьяна Дарыма «Чашкы үениң навигаторлары» шимчээшкининде билиглерже орук изээр саазын ужар-хемежигештерниң чүге ырадыр ужарын уруглардан айтырып, тайылбырлап берген. Чүге дээрге оларда кижи бүрүзүнүң эң ыдык күзелдери сиңген болур. Ынчангаш күзелдер-биле чүгленген ужар-хемелерлиг чаштарны школачы амыдырал делгемнеринге кылыйтыр ужударынче акылары, угбалары кыйгырып чалаан. 2026-2027 чаа өөредилге чылының бирги коңгазын 11 «б» класстың өөреникчизи Владислав Корчагин биле 1 «а» класстың өөреникчизи Валерия Хомушку чайып, чыскаал киржикчилерин баштайгы кичээлдерже чалаан. Надежда КУУЛАР. Буян ООРЖАКТЫҢ тырттырган чуруу. “Шын” №34 2026 чылдың сентябрь 3