💥Россияның Чазаандан деткимче
💥Россияның Чазаандан деткимче 📢Россияның Чазааның курлавыр фондузундан 574 сая ажыг рубльди Тыва Республикада 2 хуу чиигелделиг ипотека программазынче угландырар дугайында документиге РФ-тиң Чазак Даргазы Михаил Мишустин атты салган. Ооң дугайында август 24-те Чазак Даргазының оралакчылары-биле ужуражылга үезинде Михаил Мишустин боду дыңнаткан. Ол акша-хөреңгини 4300 ажыг чиигелделиг чээлилерни боттандырарынга ажыглаар. Михаил Мишустин хүлээп алган шиитпириниң дугайында чарлап тура, 2026 чылдың август эгезинде Тывага ажыл-агый аайы-биле кээп чорааш, республикада бот-тускайлаң социал-экономиктиг хөгжүлде программазының боттанылгазын көргенин демдеглээн: «Тывада оруктар болгаш чуртталга бажыңнарының тудугларын, хөй-ниити черлериниң чаагайжыттынганын, амгы үениң микрорайоннарының немежип турарын көрген бис. Социал-экономиктиг хөгжүлдениң бот-тускайлаң программазының болгаш Президентиниң айтыышкыны-биле регионга эгелээн 2 хуу чиигелделиг ипотека программазының ачызында ол бүгү боттанып турар. Чиигелделиг программа-биле 3300 ажыг чээлилерни берген. Күрүне баштыңының шиитпири-биле бо программага немелде 1000 чээлини чөпшээрээн. Чаа квартирага азы бажыңга чурттаар күзелдиг улус ипотека программазын ажыглап, чурттаар оран-савадан ипотекалап алзын дээш, республиканың бюджединче чартык миллиард ажыг рубльди кады акшаландырыышкынче киирер бис» – деп, Михаил Мишустин чугаалаан. Федералдыг чазактың деткимчезинге хамаарыштыр Тываның Баштыңы Владислав Ховалыг ук шиитпир регионга эргежок чугула дээрзин демдеглээн. Ипотека-биле бажың садып алыры кандыг-даа шаптараазын чок, чиик-адак болур болза эки. Ажы-төлдүг өг-бүлелерниң чурттаар оран-савазының айтырыын саадатпайн шиитпирлээри чугула дээрзин ол демдеглээн. Тываның Баштыңы чурттуң Президентизинге болгаш федералдыг чазакка регионга улуг деткимчени көргүзүп турары дээш, өөрүп четтиргенин илереткен. 2022 чылдың сентябрьда РФ-тиң Президентизиниң Тываның Баштыңы Владислав Ховалыг-биле ужуражылгазының түңнелинде чиигелделиг ипотека программазы 2023 чылда Тывага ажылдап эгелээн. Республика Баштыңы бо чылдың майда болган ужуражылга үезинде 2025 чылдың төнчүзүнге чедир кижи санынга хамаарыштыр чуртталга бажыңнарының тудуунуң талазы-биле чуртта эң-не тергиин 10 регионнуң санынче киргенин илеткээн. Тудуг болгаш чуртталга оран-савазынга хамаарышкан чогумчалыг өскерлиишкиннер дугайында илеткел-биле чергелештир чиигелделиг ипотека программазын узадыр дугайында Владислав Ховалыг чурт баштыңындан дилээн. Президент ол саналды деткээн. Чиигелделиг ипотека программазы эгелээнден бээр Тывада 3300 ажыг өг-бүлелер күрүнениң кады акшаландырыышкынының ачызында чурттаар оран-сава айтырыын шиитпирлээн. А. ОНДАР белеткээн. Чурукту ТР-ниң Чазаның парлалга албанындан алган. «Шын» №33 2026 чылдың август 27