💥Тываның Кадык камгалал яамызы Бурятияның медицина албан черлери-биле кады ажылдажылга...
💥Тываның Кадык камгалал яамызы Бурятияның медицина албан черлери-биле кады ажылдажылга дугуржулгаларын чарган 📢Тыва Республиканың Кадык камгалал яамызы болгаш ооң бурят партнёрлары – Доржи Банзаров аттыг Бурятияның күрүне университеди биле Чөөн чүк медициназының төвү кады ажылдажылга дугуржулгаларын чарган. IV бүгү делегей чергелиг буддийжи шуулганның шөлүнге документилерге атты салган. Бурятияның күрүне университеди-биле (Улан-Удэ) бирги кады эштежилге ажылы ийи регионда улусчу медицинаны сайзырадырынче - немелде өөредилге программаларын кады ажылдап, эртем-шинчилел ажылдарын чорудуп, чонга чырыдыышкын төлевилелдерин эрттирери көрдүнген. Тывада тудуп турар Чөөн чүк медициназының чаа төвүнге специалистерни белеткээринче онза кичээнгейни угландырган. Бурят коллегалар кыдат болгаш моол эмнээшкин школаларының чүс-чүс чылдарда мөөңнеттинген арга-дуржулгазынга үндезилеттинген амгы үениң рефлексотерапия болгаш оът-сиген-биле эмнээриниң сөөлгү аргаларын үлежиринге белен. Улусчу эмнээшкин аргаларын ажыглап, тускай шериг операциязының киржикчилерин катап тургузары – кол угланыышкын болур. Тываның Кадык камгалал яамызы-биле өөредилге программазын бадылаан соонда, тыва эмчилер Улусчу эмнээшкин институдунга өөредилгени эртип болур деп Бурятияның күрүне университединиң ректору Алдар Дамдинов демдеглээн. Бурятияда «Чөөн чүктүң улусчу эмнээшкин төвү» республиканың клиниктиг эмнээшкин-реабилитация төвүнүң» кол эмчизи Елена Бартанова-биле ийиги керээни база чарган. Ийи тала улусчу медицина адырында эртем-практиктиг ажыл-чорудулганың арга-дуржулгазын, чөөн чүктүң улусчу эмнээшкининге даянып, эм үнүштерниң шынарының дугайында медээлерни, эмчи профилактиказы болгаш реабилитация технологияларын кады солчур дугуржулганы чедип алган. Оон аңгыда ажылдакчыларга өөредилгени, эртем-шинчилел ажылдарын болгаш стажировкаларны кады эрттирер деп дугурушканнар. Кызылда Чөөн чүктүң медицина төвүнүң тудуу келир чылдың ортан үезинде доостурун сагындыраал. Ону ажыдар мурнунда тыва эмчилер бөлүү Кыдат Улус Республикага тускай өөредилгени эрткен. Күжүгет Шойгу аттыг культура фондузу Тывадан эмчи ажылдакчыларын Кыдатче өөредип чоруткан. Тускай профессионал эртемниг беш эмчи болгаш дөрт ортумак эмчи специалистери чөөн чүктүң улусчу эмнээшкин угланыышкынынга немелде тускай өөредилгени эрткен республикада бир дугаар эмчи ажылдакчылары болган. ТР-ниң Чазааның парлалга албаны.