💥Күш-ажылчы чонунга чоргаарланган
💥Күш-ажылчы чонунга чоргаарланган 📢Тываның Баштыңы бөгүн Май 1 байырлалының чыскаалынга чаңгыс чер чурттуглары-биле кады киришкен. Ооң-биле кады чаңгыс колоннага башкылар, эмчилер, бүдүрүлге черлериниң ажылдакчылары, ТШО киржикчилери, хөй ажы-төлдүг өг-бүлелер чыскаалып эрткеннер. “Тургузукчу күш-ажылдың болгаш өг-бүле ыдыктарының чылында бо байырлал канчаар-даа аажок чугула . Төрээн республикавыстың болгаш бүгү чурттуң чаагай чоруу дээш күш-ажыл дээрге бисти ёзулуг каттыштырып турар чүүл ол-дур. Кижи бүрүзү бодунуу-биле, школада, эмнелгеде азы бүдүрүлге черинде, Тываның келир үезинче үлүг-хуузун киирип турар” – деп, Владислав Ховалыг демдеглээн. Парад соонда ол тус черниң бүдүрүкчүлериниң делгелгезин сонуургап көрген. “Бистиң сайгарлыкчыларывыс, фермерлеривис болгаш техникумнарывыстың сургуулдары боттарының ажыл-агыйын сайзырадып, бодунуң продукциязын шынарлыг бүдүрүп турарын көөрге чоргааранчыг-дыр” - деп, ол өөрүшкүзүн илереткен. Чүгле ниити болгаш арыг-шынчы күш-ажыл-биле республиквысты оон-даа быжыглап ап шыдаар бис дээрзинге Тываның Баштыңы бүзүрелин илереткен. “Күш-ажыл кижини каастаар” деп бистиң өгбелеривистиң мерген домаа бо хүннерде база катап бадыткаттынып турар. Тыва чон ажыл-ишчи, уран-шевери-биле онзаланыр болгай. Ынчангаш май 1 – бистиң шуптувуска улуг байырлал болур. Частың болгаш күш-ажылдың хүнү-биле, эргим чонум!” – деп, чаңгыс чер чурттугларынга ол байырын чедирген.