💥Септекчилер
💥Септекчилер 📢Чоокта чаа редакциядан чагаа келген, чазып көре бердим. “Бистиң штаттан дашкаар корреспондентивис, идепкейлиг бижикчивис силерден дилээривис болза, тудугжуларның эки ажылының дугайында очерктен бижээш чорудуп көрүңер” деп каан мындыг. Ам канчаар редакцияның даалгазын күүседири-биле тудуг участогунга чеде бердим. Бир-ле чаа бажыңның эжиин ажыткаш, кире бээримге, тудугжулар ында ажылдаан турлар. Кирип олура-ла: – Экии, бистиң алдарлыг тудугжуларывыс! – деп мендилештим. Бир тудугжу менче мойнун узадыр сунгаш: – Бис алдарлыг тудугжулар эвес, а алдарлыг септекчилер-дир бис – дидир. – Ынчаарга бо бажыңны кымнар туткан чүвел? – Бис! – деп, шуптузу чаңгыс үн-биле харыыладылар. – Септекчилер эвес, тудугжулар ышкажыл силер – дидим. – Бо бажыңны чоокта чаа тудуп, ажыглалга киирдивис. Аанакайың, база-ла боттарывыстың буруувус-биле ам катап септеп турарывыс бо-дур ийин – деп, олар шупту чаңгыс эп-сеткил-биле чугааладылар. Тюлюш КЫЗЫЛ-ООЛ. Чурукту ГигаЧатка чуруткан. «Шын» №41 2026 чылдың октябрь 22