💥Шуулганга уткуштур белеткел
💥Шуулганга уткуштур белеткел 📢Чаа-Хөл кожуун Делегей чергелиг IV буддийжи шуулганга уткуштур шыңгыы белеткенип эгелээн. Делегейде база бир ховар дирткен сарыг шажынның тураскаалы – Сүме даанда хаяда оюп сиилбээн Авыда бурганның овур-хевири чүгле республиканың чурттакчыларының эвес, ырак-чооктан регионга келген туристерниң база бир сонуургаар черлериниң бирээзи. Ылаңгыя бо чайын болур шуулган киржикчилери, ооң аалчылары бо сарыг шажынның тураскаалдыг черин сонуургап кээри билдингир. Ынчангаш ук кожуун хөй санныг аалчылар хүлээп алырынга баш удур белеткенип эгелээн. Организакчыларның чугаазы-биле алырга, бо онза тураскаалдыг черни сонуургап кээр аалчыларга бүгү талалыг эптиг байдалдарны тургузуп, айыыл чок чорукту хандырарынче улуг кичээнгейни угландырып турар. Аңгы-аңгы маршруттарны болгаш медитация, дыштанылга зоналарын аайлап эгелээн. Чижээ, Сүме дааның девискээрин чаагайжыдып, ынаар баар орукту чаартып, кожуун төвүнде немелде аалчылар чурттаар база хөй-ниитиниң чемненилге черлерин тургузуп эгелээн. Бистиң корр. Чурукту болгаш медээни ТР-ниң Националдар херектериниң талазы-биле агентилелдиң социал четкиде арнындан алган. “Шын” №11 2026 чылдың март 26