💥Күрүнеден деткимчени алгаш…
💥Күрүнеден деткимчени алгаш… 📢«Агромотиватор» – РФ-тиң Президентизи В. Путинниң даалгазы-биле тускай шериг операциязының хоочуннарын деткиир дээш 2025 чылдың январь айда Россия девискээринге эгелээн федералдыг күрүне программазы. Көдээ ажыл-агый хөгжүдер күзелдиг тускай шериг операциязының хоочуннарынга деткимче көргүзер «Агромотиватор» деп база бир чугула программа республикада боттанып турар. Бо чылын тускай шериг операциязының ийи киржикчизи мөөрейлиг шилилгезин эрткеш, грантыларны алганнар. Төлевилелдиң киржикчилериниң бирээзи Айдың Ооржак тускай шериг операциязынга киришкен соонда, төрээн черинге чанып келгеш, амыдыралдың чаа агымынче кирген. «2022–2023 чылдарда тускай шериг операциязынга киржип турдум. «Агромотиватор» күрүне программазының дугайында эрткен чылын дыңнааш, документилерим чыып дужаапкаш, 2025 чылдың декабрь айда комиссияны эртип алдым. Күрүнеден деткимчеге алган акшам-биле чеди баш бода мал, трактор болгаш өске-даа техника садып алдым. Мал ажылынга хамаарыштыр хөй планнарлыг мен. Көдээ черге сиген-ширбиил, кажаа-хораа дээш кылыр ажылдар-ла хөй» – деп, Айдың Ооржак чугаалаан. Республиканың Көдээ ажыл-агый болгаш аъш-чем яамызының консультантызы Сагаан Кызыл-оолдуң дыңнатканы-биле алырга, Айдың Ооржак «Агромотиватор» программазының деткимчези-биле 2025 чылда 3 300 000 р (үш сая үш чүс муң рубль) түңнүг деткимчени алгаш, көдээ ажыл-агый эгелээринге чугула херек дериг-херексел болгаш чеди баш бода мал садып алган. Айдың ОНДАР. Буян ООРЖАКТЫҢ тырттырган чуруктары. “Шын” №11 2026 чылдың март 26