💥Тыва биле Крым аразынга теле-көвүрүг
💥Тыва биле Крым аразынга теле-көвүрүг 📢Кызылдың 19 дугаар школазының өөреникчилери Крым-биле дорт харылзааны тургускан. Ук школага көжүп чоруур телевидениениң студиязын тургускан. Тываның школачылары Симферопольдуң Денисов школазының өөреникчилери-биле ужурашкан. Теле-көвүрүгнү Крымның Россия-биле каттышканындан бээр 12 чыл оюнга тураскаадып эрттирген. 19 дугаар школаның бир кабинединде улуг экранда ыраккы Крымның уруглары көстүп турган. Кызылда кежээ дүжүпкен турда, Симферопольда чүгле дүъш. Ынчалза-даа мендилежиишкинниң баштайгы сөстериниң соонда уругларга үениң ылгалы билдинмейн барган. Бо теле-көвүрүг — «Крым чазының» улуг хемчеглериниң бир кезээ. Март 18-те бүгү чурт төөгүлүг каттыжыышкынның хүнүн демдеглээн. Школачыларга бо албан ёзузунуң хүнү чурттуң бир ужунда эш-өөрү канчаар чурттап чоруурун билип алыр арга болган. “Бистиң школавыс чаңгыс эвес удаа теле-көвүрүг таварыштыр өске регионнар-биле харылзажып турар. Крымның Россия-биле катап каттышкан хүнүнүң бүдүүзүнде бир школаның өөреникчилери-биле таныжып ап, оларның амыдыралын билип алыр дээш, бо хемчегни эрттирерин шиитпирледивис” — деп, Кызылдың 19 дугаар “Профлидер” школазының директорунуң чөвүлекчизи Ольга Махнова чугаалаан. Ужуражылганың программазы байлак болган: 19 дугаар школаның өөреникчилери Тываның онзагай черлериниң болгаш хөөмей-сыгыттың дугайында сонуургаткан. Крымчылар, бодунуң ээлчээнде, “Артек” болгаш далай чаңчылдарының дугайында, ол ышкаш сөөлгү чылдарда оларның чартык ортулуу канчаар өскерли бергенин таныштырган. “Крымда бисте ышкаш эки өөредилгелиг ажы-төл бар. Агаар-бойдузу +20°С чылыг. Крымче, ылаңгыя “Артек” уруглар лагеринче барыксап тур мен. Ынаар баар дизе, школаның амыдыралынга идепкейлиг киржип, кызып өөренип, авамга дузалажыры чугула” — деп, 19 дугаар школаның 7-ги классчызы Самдан-Доржу Сат чугаалаан. Теле-көвүрүг хевирлиг ужуражылгалар чаагай чаңчыл апарган. Кызылга Крымның Россия-биле каттышкан хүнүнге тураскааткан байырлыг хемчеглер бүдүн неделяның дургузунда уламчылаар. Бистиң корр. “Шын” №10 2026 чылдың март 19