💥Буддизм чүдүлгезиниң чырыы
💥Буддизм чүдүлгезиниң чырыы 📢Март 5-те Тываның Тубтен Шедруб Линг хүрээзинде "Буддизм чүдүлгезиниң чырыы" деп Кызылдың уран чүүл колледжизиниң чурулга салбырының сургуулдарының чураан чуруктарының делгелгезин ажыткан. Делгелгениң байырлыг ажыдыышкынынга Тываның Камбы-ламазының бирги оралакчызы Чамбал Монгуш биле колледжтиң директору Айлаңмаа Каң-оол сөс алгаш, чыылганнарга байыр чедирген. Ол ышкаш ук колледж чайын болур Делегей чергелиг IV буддийжи шуулган уткуштур Тубтен Шедруб Линг хүрээ, Россияның буддизм университеди-биле кады ажылдажылганың керээзин чарган. Делгелгеге чурулга уран чүүлүн шиңгээдип эгелээн колледжтиң сургуулдары Будда бурганның муң-муң чылдар бурунгаар-ла эгелээн мерген угаан сиңген өөредиинден болгаш боттарының сонуургааны сагыш-сеткилиниң ханызынче кирген чүүлдерни – бурганнар, хүрээ-хииттер болгаш буддийжи шажынның сүлде демдектерин шенеп чуруп көргүскен 17 ажылды делгээн. Оларның аразындан Айшет Салчактың «Медитация», Чимит Хертектиң «Голова Будды», Нанзат Салчактың «Одна вера» деп ажылдары шаңналдыг черлерже кирген. Делгелге март 19-ка чедир уламчылаар. Болган делгелгеден шилиттинген эки ажылдарны чайын болур шуулган үезинде делгелгеге киириштирер. Кызылдың А.Б. Чыргал-оол аттыг колледжизиниң чурулга салбырының сургуулдарынга бо дыка бедик үнелел болгаш улуг харыысалга дээрзин олар билген. Бистиң корр. Чуруктарны интернеттен алган. “Шын” №9 2026 чылдың март 12