| КЫШКА БЕЛЕТКЕЛ |
| КЫШКА БЕЛЕТКЕЛ | 💥Башкарыкчы компаниялар харыысалгага онаашкан 📢Тываның Чазаанга одалга сезонунуң дугайында чугаалашкан. Энергетика болгаш чуртталга-коммунал ажыл-агый сайыды Эдуард Куулар төпчүткен чылыг хандырылгалыг шупту 11 муниципалдыг тургузугларда одалга сезону эки эгелээнин дыңнаткан. Сезон эгелээнден бээр республиканың чылыг хандырылга организацияларынче 31,3 муң тонна хөмүр-дашты чедирген — кышкы үеде ниити хереглелдиң 13 хуузу. Шупту объектилерниң элээн каш он хонук дургузунда ажылдаарынга чедер хөмүр курлавыры бар. Кожууннарже хөмүр сөөртүлгези график ёзугаар үзүктел чок чоруп турар. Шупту дизельдиг электростанцияларны херек курлавыр-биле хандырган. 2026-2027 чылдарның одалга сезонунга ТЭК, чуртталга-коммунал ажыл-агый база социал адырлар объектилери 97 хуу кылдыр белеткенген. Планнаттынган ажылдарның 880-и доозулган, ам 27-зин доктааткан хуусаазында доозар. Белеткел үезинде чылыг четкилеринге гидравликтиг шенелделерни чорудуп, кол болгаш дузалал котельная дериг-херекселдерин хынааш септеп, базыышкын арматуразын хынаан. Муниципалдыг комиссиялар хөй аал чурттаар бажыңнарның болгаш социал албан черлериниң (школалар, уруглар садтары, эмнелгелер) белеткелин хынап дооскан. Чылыг хандырылга организацияларынга хыналдалар ам эгелээн. «Тепловик» МУБ, «Суг-Бажы» КХН, «Услуги ВИС» КХН, «Энергетические ресурсы» КХН белениниң актызынга атты салган. Арткан организацияларның документилерин Ростеххайгаарал хынап турар. Объектилерниң ниити белеткели 97 хуу, ооң иштинде одаар чүүл болгаш энергетика комплекизинде 94 хуу, чуртталга-коммунал ажыл-агый адырында 98 хуу, социал адырда 100 хуу. Росхереглелхайгааралдың Тывада эргелелиниң удуртукчузу Людмила Салчак хөй квартиралыг бажыңнар чурттакчылары кыш дүшпээнде, бергедээшкиннерге таваржып эгелээнин чугаалаан. Хереглекчилерден чуртталга-коммунал ачы-дуза айтырыгларынга хамаарыштыр үжен хире хомудалдар эргелелче кирген. Оларның хөй кезии бажыңнарның подвалдарынга хамааржыр: чамдыктары хирлиг, бир чамдыызы сугга алыскан дугайында. Эргелелдиң ажылдакчылары подвалдарны кезип хынааш, чоннуң хомудалдарын бадыткаан. Людмила Салчактың чугаазы-биле алырга, чидиг айтырыгның үнген кол чылдагааны – башкарыкчы компанияларның багай ажылында: дагдынган бажыңнарын үе-шаанда хандырып шыдавазы, иштики инженер четкилеринге планныг хыналдаларны, ажаалда-тежээлде болгаш септелгезин чорутпайн турары ындыг түңнелге эккелген. Росхереглелхайгаарал билдириишкиннерни дарый сайгарып, чогуур хемчеглерни алган. Ооң түңнелинде бо хүнге чедир суд башкарыкчы компанияларга четпестерни дарый чайладырын шиитпирлээн чурттакчыларның талазынче алды шиитпирни үндүрген: подвалдарда сугга алыскан черлерни арыглап, бок-сакты база хир-чамны аштап, агаарладып, кургадып дезинфекциялаар. Росхереглелхайгаарал боттарының девискээрлеринде, ылаңгыя кышка белеткел үезинде, чуртталга хоойлужудулгазын болгаш санитарлыг нормаларны сагып турарын хайгаарап көөрүн муниципалитеттер удуртукчуларынга сүмелээн. «Эргелел, күрүнениң чуртталга-коммунал ажыл-агый албаны, Кызылдың мэриязы, Ак-Довурак биле Шагаан-Арыг чагыргалары болгаш тус чер бот-башкарылгазының өске-даа органнары ол угланыышкынга ажылдаарын уламчылаар» — деп, Людмила Салчак чугаалаан. Медээни болгаш чурукту ТР-ниң Чазааның парлалга албанындан алган. Бистиң корр. “Шын” №40 2026 чылдың октябрь 15