💥Разведчик Елена Вавилова-биле ужурашкан
💥Разведчик Елена Вавилова-биле ужурашкан 📢Кызылдың Улусчу чогаадылга бажыңынга «Россия болгаш делегейде амгы геополитиктиг байдал. Россияның геостратегиязы» деп лекция болуп эрткен. Даштыкы разведка албанының халажылгада полковниги, чогаалчы, лектор Елена Вавилова республиканың чурттакчыларынга лекцияны номчаан. Ук хемчегни Россияның «Билиглер» ниитилелиниң деткимчези-биле организастаан. Владислав Ховалыг совет болгаш орус разведканың хоочуну Е. Вавилова-биле ажылчын ужуражылганы лекция мурнунда эрттирген. Тываның Баштыңы Е. Вавилова биле бистиң республиканың аразында солун харылзааны чугаа соонда демдеглээн: амгы үеде халажылгада разведчиктиң өөнүң ээзи, МГИМО профессору Андрей Безруков Кызылга маңаа өскен болгаш школаны дооскан. Олар 20 чыл дургузунда даштыкыга чурттап, күрүневистиң айыыл чок чоруун хандырар сорулгаларны кады күүсеткеннер. «Геополитика дугайында лекция амгы үеде чугула тема-дыр. Ынчалза-даа Елена Станиславовнаның бөдүүн чүүлдерже улуг кичээнгейни угландырганы чугула: бистиң кижи бүрүзү бөгүн эки турачы ажыл-биле азы күрүне албаны таварыштыр канчаар үлүг-хуузун киирип болурул. Елена Станиславовнага аалдап келгени база бо ажык чугаа дээш четтиргеним илереттим. Ындыг деңнелдиң профессионалдары чонувус-биле арга-дуржулгазын үлежип турары кезээде үнелиг» – деп, Владислав Ховалыг МАХ-та бодунуң постузунда бижээн. Амгы үениң геополитиказынга хамаарышкан бөгүнгү лекцияны регион болгаш федералдыг күүсекчи эрге-чагырга органнарының ажылдакчылары, эрге-хоойлу камгалаар органнарның, хөй-ниити каттыжыышкыннарының төлээлери база Тываның күрүне университединиң студентилери дыңнаан. Тыва Республиканың Чазааның Даргазының оралакчызының хүлээлгезин күүседип турар Артына Бузур-оол хемчегни ажыткан. «Билиг» российжи ниитилелден организакчыларга деткимчени көргүскени дээш, өөрүп четтиргенин ол илереткен. Россия Федерациязының Президентизи Владимир Путинниң айтыышкыннарын база 2024–2026 чылдарда Тыва Республиканың девискээринге чаңчылчаан сүлде-сүзүк болгаш мөзү-шынар үнелиг чүүлдерин кадагалап быжыглаар план күүселдези езугаар лекциялар эртип турар. А. МОНГУШ. Чиңгис СААЯНЫҢ тырттырган чуруу. “Шын” №40 2026 чылдың октябрь 15