💥80 муң ажыг кижи тарыткан
💥80 муң ажыг кижи тарыткан 📢Тывада грипп болгаш ОРВИ-ге удур тарылга кампаниязы чоруп турар. Регионнуң Кадык камгалал яамызы сезоннуг аарыгларны болдурбазының эң-не чедимчелиг аргазы болур тарылганы салдырып алырын сагындырып, ону соңгаарлатпазынче кыйгырган. Аарыг көдүрүлбээн мурнунда тарыдып алыры дээштиг. Ведомство бо хүнге чедир республикада 82 муң хире кижи тарытканын дыңнаткан. Ол дээрге коллективтиг иммунитетти чедип алырынга херек 205535 кижи тарыыр планныг көргүзүгнүң 40 хуузу-дур. Тарытканнарның аразында 16271 улуг кижилер болгаш 65448 бичии уруглар бар. Кадык камгалал ажылдакчылары эң хөйү-биле тарыткан болза, иштиг херээженнерниң 36 хире хуузу тарылганы алган. Ол ышкаш өөредилге албан черлериниң ажылдакчылары база эки көргүзүглерлиг. Алды айдан үш харга чедир назылыг чаштарны болгаш школачыларны тарыыры эки темпиде чоруп турар. Мониторинг медээзинден алырга, эрткен неделяда республикада 676 кижи ОРВИ-ден аарааны демдеглеттинген, ол дээрге эпидемиологтуг деңнелден эвээш, ынчалза-даа аарыг кижилерниң саны көвүдеп турарын эмчилер демдеглээн. Тыва Республикада гриппке удур вакцинаның бирги партиязы сентябрь 9-та келген, ында 97 муң доза, азы херек хемчээлдиң 61,2 хуузу бар. Бирги партияда улуг улуска «ФЛЮ-М» гриппке удур вакцина, алды айдан үш харга чедир назылыг чаштарга, хоочураан аарыглыг уругларга болгаш иштиг херээженнерге «Ультрикс Квадри» вакцина база уругларга «Совигрипп» вакцина келген. Вакцинаның ийиги кезээ октябрьның ийиги он хонуунда кээр ужурлуг. Тарыдып алыксаан кижилер быжыглаттынган поликлиниказынга тарылганы салдырып болур. Уругларга, иштиг херээженнерге, узун назылыгларга, хоочураан аарыг кижилерге, социал ажылдакчыларга федералдыг акша-хөреңги-биле тарылганы салып турар. Кадык камгалал яамызы грипп болгаш ОРВИ-ге удур оон өске профилактика аргаларын: холдарны саваңнап доктаамал чуурун, халдавыр нептерээнде, хөй кижилер чыылган черлерге масканы кедерин, иммунитедин быжыглаарын, шын чемненирин, амыдыралдың идепкейлиг овур-хевирин чорударын база сүмелеп турар. Бистиң корр. Чурукту ТР-ниң Чазааның парлалга албанындан алган. “Шын” №40 2026 чылдың октябрь 15