| СОЦИАЛ КЕРЭЭ |
| СОЦИАЛ КЕРЭЭ | 💥Чаа-Хөлде чаа сайгарлыкчылар 📢Чурттакчы чонга амыдырал-хандырылганың янзы-бүрү хевирлериниң ачы-дуза чедирери найысылал Кызыл хоорайдан республиканың кожууннарынче чайлып турарын социал адырның ажылдакчылары демдеглеп турарлар. Чүге дээрге хоорайда амыдырал-хандырылга ачы-дузазы чедирериниң рыногу барык долган, кандыг-бир ажылга ханы билиглерлиг, арга-дуржулгалыг, тура-соруктуг аныяктарга боттарының хууда ажыл-херээн ажыдып алыры кожууннар төптеринге азы суурларга ажыдып алыры черле кедилиг, ооң кадында оларга социал керээ шугуму-биле күрүнеден деткимче дөгүм болган. Сөөлгү үеде Чаа-Хөл кожуунда амыдырал-хандырылга шугумунда хууда ажыл-херектерин ажыткан аныяктар көвүдеп турар. Саглай Чапчын бичиизинден дааранырынга хандыкшылдыг, бир-ле чараш чүүлдү даараптар чораан. Ооң ол хандыкшылы чоорту ооң мергежили апарган. Ажыл-ишчи шевер уруг бодунуң дааранылга мастерскаязын, социал керээ акша-хөреңгизин ажыглап, ажыдып алыр аргалыг болган. Саглай Альбертовна хеп даараарынга херек амгы үениң дериг-херекселин мастерскаязынга тургускаш, чаа хепти даарап, эргилээн хепти септеп, чагыгларны эки шынарлыг күүседип турар. Социал керээниң ачызында Кежикмаа Чондан эң ылаңгыя херээжен чонга ажыктыг чараштаныр студияны болгаш парикмахерскаяны ажыткан. Нарын техника септээринге Аян Шыыраптың хандыкшылы ооң хууда ажыл-херээ апарган. База-ла социал керээ херээн Аян чаргаш, ооң-биле техника септээринге кончуг чугула дериг-херекселди садып алган. Ш. МОҢГУШ. Чаа-Хөл кожуун чагыргазының чуруктары. «Шын» №41 2026 чылдың октябрь 22 "Шын" солуннуң МАХ-каналынга каттыжыңар: max.ru/channel_shyn