💥Чаа томуйлаашкыннар
💥Чаа томуйлаашкыннар 📢Республика Баштыңы тыва Чазактың Аппарат хуралынга регионалдыг сайыттар кабинединде элээн каш кадрлар томуйлаашкынын чарлаан. Владислав Ховалыг бодунуң шиитпирин чарлап тура, кол кадрларны арттырарын чугула деп санаанын демдеглээн. «Чоокта чаа эрткен соңгулдаларга соңгукчулар идепкейин көргүзүп, чон бистиң угланыышкынывысты бедии-биле деткээн. А ол дээрге бүгү чазактың үре-түңнелдиг ажылы-дыр. Ынчангаш бистиң командавыстың 90 хуузун хевээр арттырар деп шиитпирледим» — деп, Тываның Баштыңы демдеглээн. Ынчалдыр чаа Чазактың составында боттарының албан-дужаалдарын ТР-ниң культура сайыды Виктор Чигжит, ТР-ниң орук-транспорт комплекизиниң сайыды Шораан Чыргал-оол, ТР-ниң чер болгаш өнчү-хөреңги хамаарылгаларының сайыды Аян Допуй-оол, ТР-ниң садыглажылга адырында керээ системазын чурумчудар талазы-биле сайыт Чечек Ооржак, ТР-ниң чурагайлыг хөгжүлде сайыды Эдуард Ховалыг, ТР-ниң Дириг амытаннар объектилерин камгалаар күрүне комитединиң удуртукчузу (даргазы) Артыш Салчак, ТР-ниң ажыл-чорудулгазының чамдык хевирлерин лицензиялаар болгаш хайгаараар албанның удуртукчузу Эртине Намдан, ТР-ниң Националдар херектериниң талазы-биле агентилелдиң директору Светлана Ощепкова кадагалап алганнар. ТР-ниң Саң-хөө-бюджет хайгаарал албанының удуртукчузунуң хүлээлгезин күүседир кылдыр Белек Байыр-оол томуйлаттырган. ТР-ниң хамааты камгалал болгаш онза байдалдар албанының удуртукчузунга Андрей Сатты томуйлаан. Ооң мурнунда Өвүр кожуун чагыргазының даргазынга ажылдап чораан Айдыс Куулар ТР-ниң көдээ ажыл-агый болгаш аъш-чем сайыдының хүлээлгезин күүседир. Муниципалдыг албан-дужаалга чедиишкинниг ажылдаары регионалдыг деңнелге дорт депшип ажылдаарынга чада дээрзин регион баштыңы демдеглээн. «Черге» бодунуң ажылдап шыдаарын көргүскен удуртукчулардан команданы чыып тургузар курс томуйлаашкыннарны бадыткаан. Бо томуйлалга бадыткаттынган удуртукчуларның удуртукчу командазын тургузарының хүлээлгезин бадыткап турар. Көдээ ажыл-агый сайыды чораан Юрий Оруспай ТР-ниң ветеринария албанының удуртукчузунуң хүлээлгезин күүседир кылдыр томуйлаткан. «Чоокта чаа Россияның көдээ ажыл-агый хайгааралының Хакасия биле Тывада эргелелиниң удуртукчузу Геннадий Ульчугачев-биле ужурашкаш, кызыгаар чоогу регионда эпизоотиктиг байдал-биле холбашкан айыылдарны база чугаалаштывыс. Мал ажыл-агый адырында хөй чылдарда ажылдаан байлак арга-дуржулгалыг Юрий Делгер-ооловичини ында томуйлааны, ооң профессионал билиг-мергежилинге даянган кадр шиитпири болур» — деп, Тываның Баштыңы чугаалаан. Владислав Ховалыг ооң мурнунда сайыттың бирги оралакчызы албан-дужаалды ээлеп чораан Сылдыс Ондарны ТР-ниң күш-ажыл болгаш социал политика сайыды албан-дужаалга ажылдаар, а Буянзак Түлүштү ТР-ниң спорт сайыдының хүлээлгезин күүседир кылдыр томуйлаар шиитпирлерни үндүрген. Саң-хөө яамызының, Юстиция яамызының, Кадык камгалал яамызының, Арга-арыг яамызының, Күрүнениң чуртталга-коммунал ажыл-агый инспекциязының болгаш Тариф албанының удуртукчулары ышкаш, спорт сайыдының кордакчызы федералдыг күүсекчи эрге-чагырганың чөпшээрелин алыры албан, томуйлаашкыннар ам-даа уламчылаар. «Кижи бүрүзү бүгү күжү-биле ажылдаар дээрзинге бүзүреп тур мен» — деп, Владислав Ховалыг кадр шиитпирлерин чарлаан соонда, айыткан. База ол ышкаш Тыва Республиканың Чазааның Даргазының оралакчыларын томуйлаарда, конститусчу негелделер ёзугаар республиканың Дээди Хуралы-биле (парламентизи) дугуржулга ёзугаар тургустунган чурум-биле болуп эртер. Бистиң корр. Чурукту ТР-ниң Чазааның парлалга албанындан алган. «Шын» №41 2026 чылдың октябрь 22 "Шын" солуннуң МАХ-каналынга каттыжыңар: max.ru/channel_shyn