| ДҮЖҮТ БАЙЫРЛАЛЫ |
| ДҮЖҮТ БАЙЫРЛАЛЫ | 💥Ырлыг-шоорлуг ярмарка 📢Бии-Хем кожууннуң чурттакчы чону эрткен чайын картофельдиң болгаш ногааның бедик дүжүдүн тарып өстүрген. Ажаап алган дүжүдүн хөйге көргүзер, хереглекчилерге садып-саарар дээш, кожууннуң сумуларының ногаажылары Туран хоорайда баштайгы көшкүн орус тараачыннарның парыгынга чыглып, аңаа Көдээ ажыл-агыйның ажылдакчыларының хүнүн база демдеглеп, ырлыг-шоорлуг, омак-хөглүг “Алдын күс дүжүдү” ярмарканы эрттиргеннер. Ярмарканың киржикчилери көдээниң ажыл-ишчилеринге Бии-Хем кожууннуң чагырга даргазының социал политика талазы-биле оралакчызы Орлан Байкара байырны чедирип, ажыл-ижинге чедиишкиннерни күзеп, кожууннуң чурттакчылары боттарының хууда ажыл-агыйларынга, албан черлери шөлдерде участоктарга картофельдиң болгаш ногаа аймааның дүжүдүн тарып өстүрүп турары оларның чурттуң аъш-чем талазы-биле айыыл чок чоруунга киирген үлүү, Тываның Баштыңы Владислав Ховалыгның саналы-биле боттандырып турар “Өг-бүлениң шыгжамыры” төлевилелге киржилгези деп демдеглээн. Көдээ ажыл-агыйга хөй чылдар дургузунда үре-түңнелдиг ажылы дээш Елена Николаевна Байкарага Тыва Республиканың Баштыңының Өөрүп четтириишкин бижиин тывыскан. Бии-Хемниң көдээ ажыл-агыйының мурнакчы ажылдакчыларынга кожуун чагыргазының шаңналдарын тывыскан. Кожууннуң чурттакчыларының бүдүрген эът, тараа, ногаа, сүттен кылган аъш-чемни, тайгадан чыгган каттарны, ары чигирин садып турган. Ярмаркага каткы-хөг дыңналып, хемчегниң культура программазының киржикчилери сумуларның көдээ культура бажыңнарының болгаш Туранда Марк Оюн аттыг культура төвүнүң ыраажыларының күүселдезинге ыр-шоор чаңгыланып, садыглажыышкынны улам хөглүг-омак болдурган. Ярмаркага дүжүдүн садып келген ногаажылар база орус болгаш тыва солун кожамыктарны ырлажып турганнар. Эң улуг болгаш аар деңзилиг ногааларның мөөрейи эрткен. Найырал арбанның чурттакчызы Сайсуу Моңгуштуң тарып өстүрген картофелиниң деңзизи 2 килограмм чыгыы, 1 килограмм 700 грамм болган. Сайсуу Бавууевнаның улуг картофели ээзинге бирги чергениң шаңналын чаалап берген. Туран хоорайдан Чаяна Михайловна Севилдиң — 1 кг 400 грамм, Херелмаа Ивановна Санчайбанованың картофели — 1 кг 230 грамм. Бо улуг картофельдер ээлеринге 2-ги болгаш 3-кү черниң шаңналдарын эккеп бергеннер. «Тыква — чемпион» деп номинацияга Аржаан суурнуң «Алёнушка» уруглар садының коллективиниң тарып өстүрген тыквазы тергиидээн. Ооң кили барык 9 килограмм азы 8 кг 900 грамм болган. Ийиги черде Туран хоорайдан Валентина Владимировна Дуужуктуң тыквазы — 7 кг 900 грамм, үшкү черде база-ла Туран хоорайдан Марина Захаровна Лапинаның тыквазы — 7 кг 230 грамм. Чемпион болгаш ийиги, үшкү черлерни ээлээн тыкваларның ээлерин шаңнап-мактаан. Улуг эвес-даа болза, онзагай дүрзү-хевирлиг ногааларның мөөрейи ярмарканың киржикчилериниң, садып алыкчыларның сонуургалын хайындырган. Турандан Урана Дамдыновна Түлүштүң “Куу куштар” деп композициязы, Сесерлиг суурдан Ая Васильевна Чамданның чүрек хевирлиг картофели тускай шаңналдар-биле демдеглеттинген. “Ногаалар мөөрейлериниң” тиилекчилери болгаш шаңналдыг черлерни ээлээн ногаажыларның шуптузунга Бии-Хем кожууннуң болгаш Туран хоорай чагыргаларының шаңналдарын тывыскан. Күскү дүжүт ярмарказын организастап эрттиреринге киришкен, ону солун программа-биле каастаан албан черлери болгаш хөй-ниити организациялар база шаңнал-мактал чок артпааннар. Бии-Хем кожууннуң Төпчүткен библиотека системазы 15 муң, Культура болгаш туризм төвү – 10 муң, Хадың суурнуң пенсионерлериниң “Энелер” эвилели 8 муң рубль акша шаңналдары-биле шаңнатканнар. Садыг-наймаалыг, ырлыг-шоорлуг, хөглүг-омак ярмарканың киржикчилери “Дараазында алдын күс дүжүдүнүң ярмарказынга чедир!” деп байырлажып тарааннар. Ш. ЛОПСАН. Чуруктарны ТР-ниң Көдээ ажыл-агый яамызының соцчеткизинден алган. «Шын» №41 2026 чылдың октябрь 22