💥Кожууннардан медээлер
💥Кожууннардан медээлер 📢Массалыг спортту нептередир Бии-Хемниң Аржаанга сумулар аразынга баскетбол маргылдаазы болуп эрткен. Аңаа 7 команда киришкен. Түңнелинде Аржаан суурнуң ортумак школазының командазы тиилекчи болган. Ийиги черни Бии-Хем кожууннуң чагырга чериниң командазы алган. Өөк суму чагыргазының командазы үшкү черге төлептиг болган. Чон аразынга массалыг спортту нептередир болгаш кадык-чаагай амыдыралды деткиир сорулгалыг маргылдаа хөй кижиниң спортчу хей-аъдын көдүрген. 📢Адаларга тураскааткан Эрткен дыштаныр хүннерде Тожу кожуунга Адалар хүнүнге тураскааткан “Авам, ачам база мен – спортчу өг-бүле” деп солун маргылдаа, “Ачам-биле кады” деп фоточеллендж, “Ада — бедик ат” деп спортчу болгаш культура-массалыг хемчеглер болгулаан. Кожуун, суму бүрүзүнге ада кижиниң өг-бүлеге улуг ролюнуң, ылаңгыя оол уругларга ёзулуг эр сүлдези бедик өзүп келиринге үлегер-чижек болурунуң дугайында байырлыг хемчеглер үезинде чугулалап демдеглээнин чурттакчылар чүүлдүгзүнүп, деткип, идепкейлиг киришкен. 📢Таңдының чаарттынган ном саңы Республиканың кожуун, сумуларында библиотекаларны ”Өг-бүле” федералдыг национал төлевилелдиң деткимчези-биле чаартып турар. Октябрь 17-де Таңдының Бай-Хаакта кожууннуң Төп ном саңын улуг септелге соонда байырлыг байдалга ажыткан. 1932 чылда туттунган эрги оран-саваны чаартырынга федералдыг бюджеттен 14 сая рубль чарыттынган: одалга системазын, электри хандырылгазын, өртке удур медээ берикчилери болгаш видеохайгаарал чорудар камераларны салган болгаш оран-саваның таваан быжыглааш, херимин чаартканындан аңгыда, бүрүнү-биле чаа эт-сеп, дериг-херекселди салган. Кожууннуң чагырга чери 300 муң рубльди библиотекага чаа стеллажтар, ном шкафтарын садып алырынче үндүрген. Бүрүнү-биле чаарттынган ном саңының байырлыг ажыдыышкынынга ТР-ниң культура сайыды Виктор Чигжит, А. Пушкин аттыг национал ном саңының директору Ирина Эртине, Таңды кожууннуң Төлээлекчилер хуралының баштыңы Урана Нурсат, Таңды кожууннуң чагырыкчызы Айбек Конгар, кожууннуң Культура эргелелиниң даргазы Юлия Хомушку болгаш ном саңының директору Юлия Иргит киришкен. Чаарттынган ном саңы кожуунда бар 11 салбырның методиктиг төвү болуп турар. Ооң фондузунда 47 муң ном бар, номчукчуларының саны 1500 кижи четкен. Ында номчулга залы, национал чурт-шинчилел килдизи, информастыг болгаш методика-библиографтыг төп ажылдап турар. 📢Хоочун спортчуларга Октябрь 17-де Эрзинге хол бөмбүүнүң хоочуннарының аразынга маргылдаа болуп эрткен. Ону хол бөмбүүнге тренер, күш-культура башкызы Октябрина Баажайның 45 харлаанынга тураскаадып эрттирген. Түңнелинде 40 хардан өрү назылыг херээжен спортчулар аразынга Мөрен аттыг команда тиилекчи болган. Эрзин ортумак школазының командазы ийиги черни ээлээн, үшкү черге “Сылдыс” командазы төлептиг болган. Тиилекчилерге медальдар, акша шаңналдары болгаш суй белектерни тывыскан. Массалыг спортту чон аразынга нептередип, кадык-чаагай амыдыралды суртаалдап чорууру дээш, Эрзин кожууннуң хоочун спортчулары Татьяна Янзоо, Наталья Ламажап, Нина Сагды, Ольга Бады, Анисия Боодей, Санчымаа Баанай, Ираида Анзай, Людмила Сандып, Светлана Сандыкчапка ТР-ниң Спорт яамызының мурнундан Өөрүп четтириишкин бижиктерин тывыскан. К. МОНГУШ белеткээн. Медээлерни болгаш чуруктарны кожуун чагыргаларының соцчеткиде арыннарындан алган. «Шын» №41 2026 чылдың октябрь 22