АЯК ШАЙНЫ ААРТАП ОРА
АЯК ШАЙНЫ ААРТАП ОРА 💥Чолаачылар дугайында 📢Хөй-ле чолаачыларга эртенги үе кофеден эвес, а чычаанының техниктиг байдалының хыналдазындан эгелээр. Дугуйларын, кывар-чаар материалдарының деңнелин хынаары, фараларын аштап-чодары дээрге чычаанның эртенги сула шимчээшкини-биле дөмей. Ооң бир-ле чүүлү үрели берген болза, ол хүн чүү-даа болдунмас деп санаттынар. 📢Чолаачыларның хөй кезии чычаанынга хандыкшаанындан олары-биле чугаалажып эгелээрлер. “Мээң машинам, чаш уруг дег, кичээнгей негээр, чаңнай-даа бергилээр, ынчалза-даа ол кончуг бүзүрелдиг”, “Машинаны чассыдып, аштап-арыглап, ажаап карактаарга, чугаалажырга ол кончуг амыраар, чугааны-даа билир”, “Мен машинам-биле дыка дөмей мен. Кайывыс-даа чылдагаан чокка алгыржы бээр бис”, “Мээң машинам магалыг-ла, алгырып-кышкырып, хорадап, могаттынып, чайым чок, шыдавас мен деп-даа турбас. Боду-ла чедер черимге чедирип каар”, “Мээң машинам – мээң эң чоок өңнүүм. Меңээ эмнээшкинниң-даа херээ чок, машинам-биле аян-чоруктап чоруурумга-ла чедер”, “Мээң машинам кадайым дег. Бир эвес ол шимээргеп турар болза, бир-ле чүүл болган-дыр”, “Машинамга кадайымдан артык ынак мен” дээн чижектиг сөстерни чолаачылардан болганчок дыңнаар бис. Автомобиль оларга анаа-ла аргыжылга хөлгези эвес, а ёзулуг шынчы ынак өңнүү. 📢Чолаачылар боттарының чурттап турар суурунда азы хоорайында үт-хос бүрүзүн кончуг эки билир. Танывазы черге чеде бергеш безин олар чииги-биле башкарлып чоруй баарлар. Оларга картаның-даа, 2 ГИС капсырылгазының-даа херээ чок. Чолаачыларның боттарының иштинде иштики компазы шылаг-могаг чокка ажылдап турар. Олар ёзулуг орук айтыкчылары, хоорайның лабиринтилерин өттүр халдып, машиналар тырлыышкынын оюп чорааш, чедер черинге дүргени-биле чедирип каар. 📢Ол ышкаш чычааннар “азаларын” база уттуп болбас. Оларга машиналарның маркалары, хевирлери анаа-ла ындыг сөстер эвес, а мырыңай бүдүн философия-дыр. Шак ындыг чолаачылар машинаның техниктиг тайылбырын доктаадып алган дег билир, дизельдиг база бензин-биле ажылдаар машиналарның чүзү эки, ол марка, хевир кандыгыл дээш-ле шак шагы-биле төнчү чок сайгарылгаларны олар кылыптарлар. Ынчангаш олар боттарының “демир аъдын” онза ынакшыл-биле ажаап карактап келирлер. 📢Оон аңгыда “чычаан эмчилери” деп аажок хүндүткелдиг тускай мергежилдиң чолаачылары база бар. Олар, шынап-ла, хөй-ле кижиниң кылып чадап кааш, ара октапкан машиналарын азы үрелиишкинин тыппайн турган үеде хензиг-ле чүүлүнге дээптерге ажылдай бээр. Оларны дүрген дуза эмчилери дег кайыын-даа сураглап, дилеп тургаш тып алгаш, хүндүткел-биле чалап аппаарлар. Чолаачылар шак ындыг чычаан эмчилеринге кижи эмчизинге дег сөгүрүүрүнге-даа белен. Чурукту ГигаЧат чураан. «Шын» №41 2026 чылдың октябрь 22