*Төрүттэриҥ сиригэр сылдьыы сиэрэ-туома.*
*Төрүттэриҥ сиригэр сылдьыы сиэрэ-туома.* Хас биирдии аҕа уус, ийэ уус төрүттэрэ олорбут төрүт сирдээх буолар. Төрүттэрэ кииннэрэ түспүт сирэ, онтон ыла элбээн, кэҥээн барбыт сирдэрэ. Бу сиргэ ытыгылаан тиийэн сылдьар, сүгүрүйэн сиэр-туом оҥорор улахан суолталаах. Өбүгэ сирэ, айылҕата оҕолоругар, ыччаттарыгар күүс-уох биэрэр, көмүскүүр, харыстыыр ураты эйгэлээх. Сылга биирдэ өбүгэ сиригэр, алааһыгар сылдьан сиэр-туом оҥоруохха сөп. Дьоҥҥут олохсуйан олорбут сирдэригэр кинилэри билэр дьоннор баалларыгар сылдьан ыйыталаһан, билсэн хаалар ордук буолуо этэ, умнуллубатын курдук. Билиҥҥи аҕа саастаах дьон төрүттэрин сиригэр сырыттаҕына кэлин ол суолунан эдэр көлүөнэ ситимнээн сылдьыаҕа. Бу улахан, дириҥ (сакральнай) суолталаах өйдөбүл. Билигин төрүччүнү үөрэтии киэҥник тарҕанна. Төрүччү суруллубутун кэннэ төрүт дьоммут ханна олорбуттарай, хайа сиргэ, ханнык алааска диэн ыйытыы үөскүүрэ биллэр. Ол иһин эрдэттэн төрүт сири билии, онно сылдьыы кэскиллээх хамсаныы. Өбүгэлэр олорбут сирдэригэр сылдьан сүгүрүйдэххэ, сиэр-туом оҥордоххо аҕа уус, ийэ уус туруктаах буолар, ыччаттар олохторо тупсар. Төрөөбүт дойдугар, эбэтэр өбүгэлэр олорбут сирдэригэр барыаҥ иннинэ Улуу Ытык Өбүгэлэргэр арыылаах алаадьынан, уохтаах утаҕынан, саламаатынан айах тутан илин диэкки хайыһан туран көрдьөһүллэр: ''төрөөбүт дойдубар, дьонум, өбүгэлэрим олорбут ытык сирдэрин, айылҕатын көрө-истэ, алтыһа, сүгүрүйэ диэн айаннаары суолбун-ииспин бэлэмнэнэн эрэбин, этэҥҥэ сылдьан кэлэрбэр күүс-көмө, сүбэ-ама, дурда-хахха буолуҥ'' диэн. Тиийиэхтээх сиргэр тиийдэххинэ арыылаах алаадьынан, уохтаах утаҕынан, саламаатынан Улуу Ытык өбүгэлэргэр уонна Сир-дойду иччитигэр айах тутан күндүлүүгүн. Эбии маанылаан табах, чай, минньигэс ас ууруоххун сөп. Уонна санааҥ хоту алтыһаҕын, махтанаҕын, дойдуҥ күүһүн-уоҕун иҥэринэҕин, сынньанаҕын. Онтон төннөргөр, айанныаҥ иннинэ эмиэ Улуу Ытык өбүгэлэргиттэн көрдьөһөҕүн: ''төрөөбүт дойдубар, дьонум, өбүгэлэрим олорбут ытык сирдэригэр кэлэн астына-дуоһуйа алтыстым, көрдүм-иһиттим, санаабын үллэһинним, сүгүрүйдүм, күүс-уох тэбинним, төрүччүбүт бөҕөргүүрүгэр, оҕолорум этэҥҥэ олороллоругар көрдьөстүм. Олорор сирбэр төптөрү этэҥҥэ айаннаан тиийэн дьоллоохтук олорорбор күүс-көмө, сүбэ-ама, дурда-хахха буолуҥ'' диэн''. Олорор сиргэр айаннаан тиийэн баран эмиэ махтанан сиэр-туом оҥороҕун. Ыраастанаҕын, арчыланаҕын. Түүлгүн-биткин кэтэнэҕин, илдьит кэллэҕинэ ону тойонноон сөптөөх хамсаныылары оҥороҕун. Төрүт сиргитигэр сылдьан сүгүрүйэр, махтанар, күүс-уох иҥэринэр үтүө үгэһи тутуһа сылдьыҥ, ыччаттаргытыгар утумнааҥ. Тускугут туһаайдын, кэскилгит кэҥээтин! Тускуо!