Бүгүн, от ыйын 15 күнүгэр, Ытык Нам нэһилиэгэр үлэлээтим. Ол курдук, нэһилиэк баһылыга ...
Бүгүн, от ыйын 15 күнүгэр, Ытык Нам нэһилиэгэр үлэлээтим. Ол курдук, нэһилиэк баһылыга А.И. Кардашевскай, улуус бэтэрээннэрин Сэбиэтин бэрэссэдээтэлэ И.Е. Чычахов уонна оскуола директора Е.В. Ильин буолан П.Н. Тобуруокап аатынан Нам орто оскуолатын уонна интернатын үлэтин кытта билистибит. Биллэрин курдук, Нам нэһилиэгэ улууска биир саамай бастыҥ үлэлээх нэһилиэгинэн биллэр. Ол курдук, 2025 сыл түмүгүнэн барыта 5 бырайыакка кыайыылааҕынан тахсан, быйылгы сылга үлэ-хамнас бу бырайыактары үлэҕэ киллэриигэ туһуланар. Мантан биирдэстэрин -- Нам нэһилиэгин олохтоохторо төгүрүк сыл устата көхтөөхтүк сынньанар зоналарыгар скейт-парканы бетоннааһын үлэтин -- сэргии, үөрэ көрдүбүт. Намнар «Формирование комфортной городской среды» федеральнай программаҕа «Благоустройство зоны всесезонного активного отдыха в селе Хомустах» бырайыагынан 2022 сылтан кыттан, икки сквери оҥорбуттар. Быйыл бу бырайыак бастакы этабын чэрчитинэн үһүс объект -- скейт-парк тутулла турар. Биллэрин курдук, нэһилиэк олохтоохторо бу бырайыак кыайарын туһугар общественнай территориялары талыыга Бүтүн Россиятааҕы онлайн куоластааһын түмүгүнэн 4187 куолаһы хомуйан, 8 нэһилиэк нуорматын толорбуттара уонна республикаҕа биир бастыҥ көрдөрүүнү ситиспиттэрэ. Кэлэр сылга бу скейт-парк аттыгар хаҥкылыыр сири оҥорор былааннаахтар. Иккиһинэн, «Комплексное развитие сельских территорий» программаҕа кыайыылааҕынан тахсан, «Нам нэһилиэгиттэн Аҕа дойду Улуу сэриитигэр кыттыыны ылбыт бэтэрээннэр мэҥэ бэлиэлэрин тупсаран оҥоруу» бырайыак 2-с этабын чэрчитинэн, 2 стендэни уонна стеланы туруоруохтара. Манна 252 Аҕа дойду Улуу сэриитин кыттыылаахтарын хаартыскалара ыйаныаҕа, онтон QR-кодунан хас биирдии ветеран туһунан толору дааннайы билсиэххэ сөп. Үсүһүнэн, СР транспортка министерствота ыыппыт «Нам уулуссаларын өрөмүөннээһин» бырайыакка 2024 с. ыытыллыбыт конкурска икки сыллаах үлэни кыайан, 2025 с. милиционер А. Федоров аатынан, онтон быйыл Г. Мухоплев-Лөкөй аатынан уулуссалар өрөмүөннэрэ түмүктэммит. Салгыы олохтоох көҕүлээһиннэри өйөөһүн программатынан (ППМИ) ыһыахтыыр сир 2-с этабын үлэтин чэрчитинэн 2 ураһаны, аһыыр беседканы, холумтаны, киирии ааркатын, биир сэргэни уонна Аал-Луук маһы, туалеты туппуттар. ППМИ-нан иккис бырайыактарынан «Тобуруокап ыллыга» учаастагы сырдатыы буолар. Биллэрин курдук, икки сыл буола-буола норуодунай бэйиэппит Бүөтүр Тобуруокап сырдык аатын үйэтитэн «Тобуруокап көмүс күһүнэ» республикатааҕы тэрээһин Нам улууһугар киэҥник ыытыллар. Ол курдук, 2021-2022 сс. Даркылаах учаастагын тупсаран оҥоруу чэрчитинэн улахан объегы туппут буоллахтарына, быйыл, балаҕан ыйын 4 күнүгэр диэри, «Тобуруокап ыллыгар» 1,2 км усталаах уот линиятын тардыахтара. Бу уопсайа 19 мөлүйүөнтэн тахса сууммалаах бырайыактары кыайан, Нам нэһилиэгин дьаһалтата күүстээх, тэтимнээх үлэни ыыта олороро хайҕаллаах, атын нэһилиэктэргэ холобур эрэ буолар. #Намнэһилиэгэ #Бырайыактарынанүлэ #ППМИ #Сайдыы http://T.me/ValeriNikolaev