Бүгүн, ыам ыйын 26 күнүгэр, улууспут оскуолаларын бүтэрэр күндү оҕолорбутугар «Түмүк чу...
Бүгүн, ыам ыйын 26 күнүгэр, улууспут оскуолаларын бүтэрэр күндү оҕолорбутугар «Түмүк чуораан» тыаһыыр долгутуулаах күнүгэр, Д.С. Спиридонов аатынан улуустааҕы гимназия үөрэнээччилэрин, учууталларын уонна төрөппүттэрин бу дьоро түгэнинэн эҕэрдэлиир өрөгөйдөөх линейкаҕа кыттыыны ыллым. Үчүгэй үөрэхтээх, улуус, республика олоҕор көхтөөх общественнай позициялаах, ситиһиилээх оҕолорго бэйэм ааппыттан махтал суруктары туттардым. Бу үөрэх сылын улууспутугар 175 оҕо 11-с кылааһы, 377 оҕо 9-с кылааһы ситиһиилээхтик бүтэрэн, улахан олоххо үктэнэллэр. Уһуйааннартан 223 оҕо оскуола боруогун атыллыырга бэлэмнэнэллэр. Кинилэргэ барыларыгар инники олохторугар ситиһиилэри, дьолу баҕарабын! Маны сэргэ улуус үөрэнээччилэрэ үөрэх уонна билим эйгэтигэр сүҥкэн ситиһиилэри көрдөрдүлэр: 73 оҕобут Бүтүн Арассыыйатааҕы научнай-практическай конференцияларга кыттан, 60 оҕо призер буолан, үрдүк билиилэрин көрдөрдүлэр. Бүтүн Арассыыйатааҕы олимпиада регионнааҕы түһүмэҕэр уонна СӨ оскуолаларын оҕолорун олимпиадатыгар быйыл 28 оҕо призер буоллулар. "Профи" өрөспүүбүлүкэтээҕи күрэхтэһиигэ 17 финалистаахпыт уонна 6 призердаахпыт. Хотугу-Илиҥҥи Федеральнай университет олимпиадатыгар 53 призер үөрэх эйгэтигэр улууспут аатын үрдүктүк ааттаттылар. Оҕолорбут ситиһиилэрэ улууска үөрэхтээһин эйгэтин хас биирдии көрдөрүүтүгэр улахан хамсааһын барбытын үрдүк көрдөрүүтэ буолар. Күндү оҕолорбут, өрүү инники диэки дьулуһаргыт, билиигэ тардыһаргыт биһигини олус үөрдэр, эһиги ситиһиигитинэн киэн туттабыт. Ытыктабыллаах учууталларга, уһуйааччыларга уонна төрөппүттэргэ оҕолорбут сайдыытыгар киллэрбит сыраҕыт, үтүө суобастаах үлэҕит иһин дириҥ махталбын тиэрдэбин. Эһиги биэрбит дириҥ билиигит, иитиигит уонна өйөбүлгүт оҕолорбут үрдүк ситиһиилэрин төрүтэ буолар. Хас биирдиигитигэр чэгиэн доруобуйаны, дьолу-соргуну, үлэҕитигэр уонна үөрэххитигэр саҥа ситиһиилэри баҕарабын! Эҕэрдэни кытта, Үөһээ Бүлүү улууһун баһылыга Валерий Николаев. #Тиһэхчуораан #Үөрэҕирии150сыла #Улуускэскилэ T.me/ValeriNikolaev