«Марий Элыште ыштыме кочкыш сату сай качестван», –
«Марий Элыште ыштыме кочкыш сату сай качестван», – каласен ТАСС-лан пуымо интервьюштыжо Марий Эл вуйлатыше Юрий Зайцев. Тудо Марий Элыште ыштен лукмо сату, республикыште туризм вияҥме да регионышто нацпроектым илышыш шыҥдарыме нерген каласкален. ТАСС-ын журналистше шурно лектыш дене кылдалтше кӱлешан йодыш гыч тӱҥалын. Юрий Зайцев май тӱҥалтыште игече чынжымак пеш сайжак лийын огыл, туге гынат аграрий-влак тиде нелылыкым сеҥеныт да планысе показательым шуктеныт манын палемден. Тений икияшым 127 тӱжем гектарыш ӱдымӧ, пырчан да отызаным – 82 тӱжем гектарыш, пареҥгым – 2,4 тӱжем гектарыш, пакчасаскам – 1,8 тӱжем гектарыш, ӱян культурым – 9,8 тӱжем гектарыш. Федерал ден республикысе бюджетла гыч 591,3 млн. теҥге полышым ойырымо. Тудым шылым да шӧрым ямдылыме вольык озанлыкыш,пырчым ямдылымашке, продукцийым перерабатыватлымашке да изи бизнеслан полшымашке колтеныт. Регион вуйлатышын мутшо почеш, ялозанлык продукцийым Марий Эл шкаланже тичмашын ситара, тыгак икмыняр ужашыжым вес регионлаш да вес эллаш колтеда.