Лач ик идалык ончыч, 2025 ий июльышто, «Защитники Отечества» фонд лӱмын тӱҥалме сарзе о...
Лач ик идалык ончыч, 2025 ий июльышто, «Защитники Отечества» фонд лӱмын тӱҥалме сарзе операцийын ветеранже-влаклан адаптивный (йӧнештарыме) вургемым пуэдаш тӱҥалын. Тудым ойырымо годым специалист-влак айдемын тазалыкшым, капкыл ӱнаржым да кажнылан шкаланже мо келшышым шотыш налыт. Ветеранын йодмыж почеш эксперт каҥаш тудлан мо келшымым посна онча. Тыге СВО-н ветеранже вургемым кугыт, тӱс, модель дене шкеак ойырен кертеш. Тыгай йӧнештарыме вургемым фонд СВО герой-влаклан яра, ӱнарым погымо технический йӧн семын пуа. Кажнылан кум комплект ойыралтеш: кеҥежымсе, телымсе да демисезоный. Комплектыш 12 тӱрлӧ вургем пура. Тыште йӧнештарыме вургемым ургымо шотышто Тӱнямбал конкурсышто сеҥыше-влакын ыштыме модельышт кучылталтеш. Рвезе-влаклан йӧнештарыме вургемым «Защитники Отечества» фондым вуйлатыше Анна Цивилёван ойжо почеш, Россий Президент Владимир Путинын полшымыжлан кӧра пуэдаш йӧн лектын. Таче марте «Защитники Отечества» фондын республикысе пӧлкаже 50 наре вургем комплектым пуэн. Эн ончыч тудым Оршанка район гыч СВО салтак Александр Иванов налын. Тудо сӧйыштӧ шола кидшым йомдарен. «Фондын тыршымыжлан да полшымыжлан тау», – манеш Александр Иванович.