230 утла еҥ «Тазалык пунктышто» экспресс-тергымашым эртен.
230 утла еҥ «Тазалык пунктышто» экспресс-тергымашым эртен. Кугарнян да шуматкечын Йошкар-Оласе общественный кумдыклаште «Тазалык пункт-влак» пашам ыштеныт. Тӱвыра да каныме рӱдӧ паркыште да В.И. Ленин лӱмеш тӱвыра полат воктенысе площадкылаште медик-влак 230 утла еҥым тергеныт. Чыла кумылан-влак экспресс-тергымашым яра эртен кертыныт: вӱрыштӧ глюкозо ден кислородын кӱкшытыштым, артериальный ден шинча кӧргысӧ давленийым, кап нелытын индексшым да тазалыкын моло тӱҥ показательжым висен кертыныт. Тӱвыра да каныме рӱдӧ паркыште еҥ-влакым терапевт консультироватлен. В.И. Ленин лӱмеш тӱвыра полат воктене приёмым эндокринолог да дерматолог вӱденыт. «Тазалык пункт» — Марий Эл вуйлатыше Юрий Зайцевын «Таза республик» кугу проектшын ик йогынжо. Проект «Единый Россий» партийын полшымыж дене илышыш шыҥдаралтеш.