У Торъял округ Токтарсола ялыште кумдыкым тӱзатыме шотышто темлымаш-влакым каҥашеныт.
У Торъял округ Токтарсола ялыште кумдыкым тӱзатыме шотышто темлымаш-влакым каҥашеныт. Марий Элым вуйлатыше Юрий Зайцевын «Инициативы жителей» проектше дене келшышын, «Единый Россий» партийын депутатше-влак дене вашлиймаш эртен. Токтарсола ялыште илыше-шамыч вес ийынак илышыш шыҥдаралт кертше шонымаш-влакым темленыт. Тӱҥ инициативе коклаште Ӱлыл Кугэҥер ялыште корным тӱзатымым палемдыман. Йӱр деч вара тудын дене кудал эрташ неле, сандене калык ты проектым темлен да республикысе отборышто участвоватлаш документым ямдылаш тӱҥалын. Округышто проект-влакым илышыш шыҥдарыме сай пример уло. «Инициативы жителей» проектлан кӧра У Торъял округышто СВО-н участникше-влаклан обелискым шогалтыме, йоча площадкым ыштыме, Токтар-Онар» стелым вераҥденыт. «Мый верысе инициативым илышыш шыҥдарымаште икымше ий веле огыл полшем да раш каласен кертам: тиде механизм чынжымак пашам ышта», - палемден «Единый Россий» партийын У Торъял районысо верысе пӧлкажын секретарьже Евгений Небогатиков. «Инициативы жителей» проектыш темлымашым 15 сентябрь марте пуаш лиеш.