4 октябрьыште Москосо Калык-влак пӧртыштӧ «Моско – тыныслык, келшымаш да сӧрасен илыме ...
4 октябрьыште Москосо Калык-влак пӧртыштӧ «Моско – тыныслык, келшымаш да сӧрасен илыме ола» проект почеш Марий тӱвыра кече эртен. Тыгай кечым рӱдоланан эн покшелныжак эртарымаш пеш шуко нерген ойла. Мероприятий кугу лийын. Тудым Моско олан правительствыже, Москосо Калык-влак пӧрт, Марий Элын Россий Федераций Президент пеленысе эре улшо представительствыже, Марий Элын тӱвыра, савыктыш да калык-влакын пашашт шотышто министерстве, «Москосо марий-влак» ушем вораҥдареныт. Шуко площадке пашам ыштен. Иктыштыже «Марий Элын культур кодшо» йыргешке ӱстел эртаралтын. Тушко МарНИИЯЛИ-н учёныйжо-влак ушненыт. Модераторжо дисциплин-влак кокласе йодышлам шымлыше лабораторийын тӱҥ шанче пашаеҥже, филологий науко доктор Любовь Абукаева лийын. Тудак марий фольклорышто культур код нерген каласкален. «Этнологий» йыжыҥын вӱдышӧ шанче пашаеҥже Сергей Свечников «Этнические контакты мари с народами Среднего Поволжья в XV–XVII вв.»монографийже дене палдарен. Кугурак шанче пашаеҥ Дмитрий Байдемиров «Марий суртышто вий-куатан вер: кушто илыш-йӱла илен» теме дене шымлымашыж нерген ойлен. Калык-влак коклаште тыныслыкым да сӧрасымым пеҥгыдемден шогымылан, Российысе калык-влакын тӱвыраштым аралымылан да шарымылан институтын учёныйжо-влаклан Москосо Калык-влак пӧртын директоржо Сергей Ануфриенко дипломым кучыктен. Тиде пеш кӱлешан мероприятийым эртарен колташ полшымылан МарНИИЯЛИ Марий Элым вуйлатыше Юрий Зайцевлан, Марий Элын Россий Федераций Президент пеленысе эре улшо еҥже Ольга Бадма-Халгаевалан, Марий Эл правительстве председательын алмаштышыже – Марий Элын тӱвыра, савыктыш да калык-влакын пашашт шотышто министр Константин Ивановлан уло чон дене таум ышта. 📸Фотом МарНИИЯЛИ-н воткыл лаштыкше гыч налме.