Марий Эл Республик шке сатужым да сеҥымашыжым «Шӧртньӧ шыже-2026» агропромышленный онче...
Марий Эл Республик шке сатужым да сеҥымашыжым «Шӧртньӧ шыже-2026» агропромышленный ончерыште ончыкта. Выставке 7-10 октябрьыште «Тимирязев рӱдерыште» эрта.Тений ончер агропромышленный комплексын пайдалын кушмо технологийжылан пӧлеклалтын. Паша да экспозиций программын негызшым Россий Ялозанлык министерствын кум научно-технологический проектше ышта: агротехнологий, вольык ончымо да биотехнологий. Лач нине векторлаште Таче Марий Элын аграрный секторжат чот вияҥеш. Выставкын унаже-влак Марий Элын брендше, «Чарла окорок» дене палыме лийын кертыт. Тыгак экспозицийыште каза, шорык да ушкал шӧр гыч ыштыме сырым, рикоттан кондитер сатум, ферментироватлыме вуйдеҥге чайым да «Йола» агрохолдингын премиальный шыл гыч ямдылыме продукцийжым ужын кертыт. Республикын стендыштыже верысе агронаукын сеҥымашыжат ончыкталтеш. Биотехнологий направленийланат посна тӱткышым ойырымо. "Марий Элын тӱҥ отраслевой выставкылашкыже ушнымаш регионысо агробизнесым ончыко колташ йӧным ышта. Ме йӱлам переген моштымынам ончыктена, тыгодым кызытсе технологийым лӱдде шыҥдарена, конкуренцийым чытен кертше бренд-влакым ыштена. Аграрийна-влакын продукцийышт республик деч тораштат палыме улыт. "Шӧртньӧ шыже" выставке гай площадке-влак мыланна ужалыме рынкым кумдаҥдаш да регионын экономике вий-куатшым пеҥгыдемдаш полшат», - палемден министрже Павел Раевский. 📸Фотом Марий Элын Ялозанлык да продовольствий министерствын воткыл лаштыкше гыч налме.