Нэһилиэк баһылыктарыгар, солбуйааччыларыгар, специалистарга үөрэх тэрилиннэ
Нэһилиэк баһылыктарыгар, солбуйааччыларыгар, специалистарга үөрэх тэрилиннэ Алтынньы 21 күнүгэр улуус дьаһалтатын мунньахтыыр саалатыгар "Основы управленческих технологий" улуустааҕы семинар тэрилиннэ. Улуустааҕы тыа сирин көҕүлүүр дириэксийэ сүрүн специалиһа В.И.Колодезникова үөрэҕи ыытта. Отуттан тахса киһи үөрэннэ. Толору үөрэммиттэргэ Саха Өрөспүүбүлүкэтин инновационнай менеджмент үрдүкү оскуолатын электроннай удостоверенията бэриллиэҕэ. Күн аҥаарыгар Россия регионнарын, Киргизия үлэлэрин уопуттарын көхтөөх биир дойдулаахтарбыт сырдаттылар. Харбалаахтааҕы "Теплица" түөлбэ кэммиэрчискэйэ суох тэрилтэ салайааччыта Д.Е.Соломонова Бурятия Өрөспүүбүлүкэтин уопутун сырдатта. Регион таһымнаах ТОС-тары иилиир-саҕалыыр тэрилтэлээх буоланнар федеральнай грааннартан үбү ылыыга Дойдуга биир бастыҥ көрдөрүүлээхтэр. Нэһилиэктэригэ “Түөлбэ дьиэтэ” – диэн национальнай дизайнаах тутуулардаахтарын, түөлбэнэн үлэлэрин тута сылдьалларын, нэһилиэнньэ көхтөөҕүн бэлиэтээтэ. Таатта улууһун урбаанньыттары, кээмиэрчискэйэ суох тэрилтэлэри өйүүр ресурснай киинин салайааччыта, улуустааҕы тыа сирин көҕүлүүр дириэксийэ сүрүн специалиһа С.И.Григорьева "Түөлбэ - Таатта улууһун сайдар суола" - дойду Президенин фондатын граанынан Хакасияҕа сырыытын кэпсээтэ. Хакасия Өрөспүүбүлүкэтэ культуура нэһилиэстибэтин баайын бренд оҥостон, туризмы тэтимнээхтик сайыннарбыт. Таатта улууһун туризма бу үтүө уопутунан үлэлиэн сөбүн ыйда. Улуустааҕы норуот айымньытын дьиэтин иһинэн "Мандар Уус" научнай креативнай киин салайааччыта М.В.Степанова Киргизия Өрөспүүбүлүкэтигэр “Көс омуктар ооннььулара” (“Игры кочевников”) аан дойдутааҕы спорт оонньууларыгар сырыытын сырдатта. “Кырчын” туристическай киин үлэтин көрдөрдө. Норуот уус уран оҥоһуктарын этническай базарын хайдах тэрийбиттэрин кэпсээтэ. Туризмҥа, национальнай дизайнаах модульнай гостиницалары тутууга Киргизия государствота 4,5 млрд.харчыны көрөллөр эбит. Урбаанньыттар көхтөөхтүк кыттаннар туризм сервиһэ көдьүүстээхтик тэриллэр – сынньана кэлээччи элбээн иһиэрин бэлиэтээтэ. А.И.Софронов - Алампа аатынан Ытык Күөл орто оскуолатын дириэктэрэ И.Е.Будикин Вологодскай уобалас Тотьма куоракка үөрэнэн кэлбитин кэпсээтэ. 8660 киһи олорор Тотьма куорат дойдуга грааны ылыытынан бастыҥ буолар. Эмиэ культуура нэһилиэстибэтигэр тирэҕирэн млн. грааны 10 сыл иһигэр ыланнар олоххо киллэрбиттэр. Кэнники икки сылга кыайыыларын тэтимэ арыый мөлтөөбүт. Сыл ахсын Арассыыйа таһымнаах үөрэхтэри ыытаннар, уопут атастаһаннар, саҥаттан-саҥа проектары кыайбыттары бэлиэтээтэ. Саха Өрөспүүбүлүкэтин үп министиэристибэтин олохтоохтор этиилэрин өйүүр программа (ППМИ) 2027 с. уларыйыылары, былааннары ырытыһыы буолла. Таатта улууһа быйыл 13 проегы кыайбыта. Эһиил өссө турунан киирсэрдии былааннанар. Улуустааҕы тыа сирин көҕүлүүр дириэксийэтэ улууска ППМИ куратора буолар. Алтынньы 22 күнүттэн – сэтинньи 20 күнүгэр диэри сайаапакалар бэлэм буолуохтаахтар. Таатта улууһун дьаһалтата @taattagazeta