🤾🏆Бэҕэһээ Мэҥэ Хаҥалас улууһун Аллараа Бэстээх бөһүөлэгин спортивнай саалатыгар көрбө...
🤾🏆Бэҕэһээ Мэҥэ Хаҥалас улууһун Аллараа Бэстээх бөһүөлэгин спортивнай саалатыгар көрбөттөр Аан дойдутааҕы күннэригэр анаммыт «Үрүҥ торуоска» аахсыйа месячник чэрчитинэн, «Заречье Кубога» диэн волейболга уонна остуол оонньууларыгар харахтарынан мөлтөх дьон күрэхтэһиитэ буолан ааста. Күрэхтэһии икки көрүҥүнэн ыытылынна. Волейбол былаһааккатыгар хамаандалар ураты сымса хамсаныылары көрдөрдүлэр. Оттон остуол оонньууларыгар эмиэ сытыы киирсиилэр таҕыстылар. Спортсменнар өй оонньууларыгар: калахха, катаминоҕа уонна квиксоҕа күөн көрүстүлэр. Күрэхтэһии үрдүк тэрээһиннээхтик ааспытын түмүгэр, уопсай хамаанданан зачекка миэстэлэр маннык быһаарылыннылар: 🥇миэстэ — Мэҥэ Хаҥалас улууһун хамаандата, бэлэмнэниитин үрдүк таһымын көрдөрдө. 🥈миэстэ — Амма улууһун хамаандата чиҥник ылла. 🥉миэстэ — Таатта улууһун хамаандата. Таатта улууһуттан бириистээх миэстэлэри ылбыт дьоммутун киэн тутта билиһиннэрэбит: Калах - Захарова Любовь чаҕылхай 2-с миэстэни ылла! Катамино - эдэркээн сулус Игнатьева Алиса эмиэ иккис үктэлгэ таҕыста, оҕо эрээри киһи сөҕөр таһымын уонна дьулуурун көрдөрдө. Квиксо - Петрова Эмма, уһулучу түргэн хардарыыны уонна болҕомтону көрдөрөн, чиэстээх 3-с миэстэни ылла. Волейбол көрүҥэр улууспут доруобуйаларынан хааччахтаах дьонун тренерэ Иван Тистяхов "Үчүгэй оонньооччу" анал бирииһи тутта. Таатта улууһун сүүмэрдэммит хамаандатын 🥉боруонса мэтээлинэн эҕэрдэлиибит! Хамаанда хас биирдии кыттааччыта кыайыыга дьулуурун көрдөрдө. «Заречье Кубога» спорт — түмэр, кынаттыыр уонна, хараҕынан көрбөт да буоллахха, эйгэни сырдык оҥорорго көмөлөһөрүн өссө төгүл дакаастаата. Тэрийээччилэр уонна кыттааччылар маннык турнирдар үтүө үгэскэ кубулуйан, саҥа ааттары арыйан, хамсаныы уонна алтыһыы үөрүүтүн бэлэхтии туруохтара диэн эрэллээхтэр. Тус махтал тылларын Таатта улууһун баһылыгын солбуйааччыга Никифор Никифорович Жерготовка тиэрдиэхпитин баҕарабыт. Айаммытын тэрийиигэ өйөбүлгүт, болҕомтоҕут, иһин махтанабыт. Эһиги көмөҕүтүнэн хамаандабыт төрөөбүт улууспутун бу күрэхтэһиигэ чиэстээхтик көрдөрдө. Кыттааччыларга уонна тэрийээччилэргэ ытыктабылы кытта Светлана Дорофеева, Таатта көрбөт уонна мөлтөхтүк көрөр дьон уопсастыбатын бэрэссэдээтэлэ. @taattagazeta @ulusmedia