Улуус баһылыга үөрэх тэрилтэлэрин салайааччыларын кытта көрүстэ — 10 июня 2026 г. в 05:40:29
Улуус баһылыга үөрэх тэрилтэлэрин салайааччыларын кытта көрүстэ Бүгүн, бэс ыйын 10 күнүгэр, улуус баһылыга Юрий Слепцов үөрэх тэрилтэлэрин салайааччыларын кытта көрүстэ, мунньаҕы салайан ыытта. Мунньахха үөрэх эйгэтин сыалларын-соруктарын уонна инники былааннарын ырытыстылар. Ол курдук, үөрэҕирии ситимин сааһылааһын (упорядочение сети образовательных организаций) — бу кэм ирдэбилигэр уонна олох уларыйыытыгар сөп түбэһиннэрэн, үөрэх тэрилтэлэрин (оскуолалары, оҕо саадтарын, эбии үөрэхтээһин кииннэрин) үлэлэрин-хайысхаларын уларытан тэрийии уонна тупсарыы боппуруоһун көрдүлэр, дьүүллэстилэр. Салгыы саҥа оскуолалары уонна оҕо уһуйааннарын тутуу уочурата, 2026 сыллаах өрөмүөн үлэлэрэ уонна капитальнай өрөмүөҥҥэ федеральнай бюджеттан үп көрүллүүтүн ситиһии туһунан кэпсэттилэр. Ону таһынан, тэрилтэлэр бюджеттарыгар тас үп киллэриилэрин боппуруоһун дьүүллэстилэр. Улуустааҕы үөрэх управлениетын иитии уонна эбии үөрэхтээһин отделын салайааччыта Алёна Ноговицына бэс ыйыгар оҕолор сайыҥҥы сынньалаҥнарын уонна дьарыктарын туһунан иһитиннэрии оҥордо. Мунньах кэмигэр салайааччылартан элбэх ыйытыы уонна этии киирдэ. Юрий Иннокентьевич саҥа үөрэх сылыгар бэлэмнэниигэ чопчу соруктары туруорда. «Нам улууһа” МО пресс-сулууспата