УЛУУС БАҺЫЛЫГЫН ПЛАНЕРКАТЫТТАН СОНУННАР
УЛУУС БАҺЫЛЫГЫН ПЛАНЕРКАТЫТТАН СОНУННАР Бүгүн, алтынньы 5 күнүгэр, улуус баһылыга Юрий Слепцов ааспыт нэдиэлэ түмүгүн таһаарар уонна инники соруктары туруорар бэнидиэнньиктээҕи мунньаҕы ыытта. Управлениелар уонна тэрилтэлэр салайааччылара иһитиннэриилэри оҥордулар. Улуус кылаабынай бырааһын солбуйааччы Вера Атласова иһитиннэриитэ Ааспыт нэдиэлэҕэ 103 киһи суһал көмөҕө наадыйбыт, о.и. 63 улахан киһи, 40 оҕо. 32 ыарыһах Дьокуускай куорат анал балыыһаларыгар салгыы эмкэ Флюорограмманы улуус үрдүнэн, бүгүҥҥү күҥҥэ, 17431 киһи ааспыт. Грипп утары быһыыны 10100 (5100 улахан киһи, 5000 оҕо) киһи ылбыт, о.э. быһыыны ылыы 46,30%-ҥа тэҥнэспит. Искраҕа эмчиттэр биригээдэлэрэ тиийэн 13 киһини флюорограммаҕа түһэрбит, 25 оҕо, 20 улахан киһи доруобуйатын көрбүт. Алтынньы 5-18 күннэригэр Салбаҥҥа тиийэн көһө сылдьар көмөнү биэлсэр Абрамов И.Р. оҥоруоҕа. Үөрэх управлениетын начальнига Мария Игнатьева иһитиннэриитэ - Бүгүҥҥү күҥҥэ бары оскуолаларга уонна оҕо уһуйааннарыгар үөрэх процеһа тохтообокко барар, дьаҥынан карантин биллэриллэ илик. Быһыыны ылыы күүскэ барар. Үөрэх бастакы чиэппэрэ түмүктэнэрэ чугаһаата. Ол курдук, үөрэнээччилэр алтынньы 26 күнүттэн сэтинньи 3 күнүгэр диэри күһүҥҥү сынньалаҥҥа барыахтара. Билигин оскуолаларынан предметнэй олимпиадалар ыытыллаллар, онно кыайбыттар улуустааҕы түһүмэххэ мустуохтара. Ааспыт нэдиэлэ биир улахан тэрээһининэн СӨ Ил Дарханын иһинэн үлэлиир Инновационнай менеджмент оскуолатын үлэһиттэрэ кэлэннэр Модут оскуолатын баазатыгар “Үөрэх тэрилтэлэрин стратегическай сайдыылара” диэн сессияны тэрийиилэрэ буолла. Манна уопсайа 58 үөрэх тэрилтэтин салайааччыта идэтин таһымын үрдэттэ. Балаҕан ыйын 25-алтынньы 25 күннэригэр Нам улууһугар үөрэхтээһин ситимэ тэриллибитэ 155 сылынан “Учитель, перед именем твоим!” месячник биллэриллибитэ. Биир ый устата үгүс тэрээһин барара былааннанар. Ол курдук, балаҕан ыйын 25 күнүттэн оскуолаҕа киириэн иннинээҕи саастаах үөрэх тэрилтэлэрин үлэһиттэригэр анаан үөрэхтээһин түмэлигэр Федорова Анна Степановна, Нам сэлиэнньэтин 2 №-дээх оҕо саадын сэбиэдиссэйинэн өр сылларга бэриниилээхтик үлэлээбит ветеран педагог, сырдык кэриэһигэр кини методическай үлэтин быыстапката буола турар. Нам сэлиэнньэтин 11 №-дээх “Сулусчаан” оҕо саадын эбии үөрэхтээһин педагога Уваровская Мария Алексеевна СӨ Ил Дарханын “Бастыҥ педагог-наставник” бириэмийэтин ылары ситистэ. Учуутал күнүн көрсө улууска үөрэхтээһин тэриллибитэ 150 сылыгар анаммыт сквергэ уонна кэргэннии учууталлар Василий Егорович уонна Мария Ивановна Колмогоровтар памятниктарыгар сибэкки дьөрбөтүн уурдубут. Алтынньы 7 күнүгэр, Эбии үөрэхтээһин күнүгэр, улууска баар 5 эбии үөрэхтээһин тэрилтэлэрин мунньаммыт Бастакы Хомустаах нэһилиэгин ”Сайдыы” оҕо айымньытын дьиэтигэр улахан тэрээһин ыытыахпыт. Алтынньы 15-16 күннэригэр «Учитель года» куонкурус улуустааҕы түһүмэҕэ барыаҕа. М.К. Аммосов аатынан Хатырык оскуолатын 95 сыллаах юбилейа алтынньы 10 күнүгэр, Бөтүҥ оскуолатын 120 сыллаах юбилейа алтынньы 12 күнүгэр былааннаналлар. Саҥа Дьылга диэри 10-тан тахса оскуола уонна оҕо саадтара юбилейдарын бэлиэтиэхтэрэ. Нам 2 №-дээх оскуолата 75 сылын ылыаҕа. Бу күннэргэ - алтынньы бүтүүтүгэр, сэтинньи саҥатыгар - Хамаҕаттатааҕы саха-француз лиссиэй, Намнааҕы “КубИТ” технопарк юбилейдара тэриллиэхтэрэ. Бу нэдиэлэҕэ оскуолаларга Учуутал күннэрэ бэлиэтэниэхтэрэ. Үөрэх управлениетын экспертнэй сэбиэтин көрүүтүгэр, Модут уонна Бөтүҥ оскуолаларын историяларын үөрэтиигэ саҥа архыыб докумуоннара көстүбүттэринэн, Шарапова Елена Ивановна саҥа электроннай кинигэни оҥоруутун бырайыага көрүлүннэ уонна биһирэннэ. (Салгыыта бэчээттэниэҕэ)