„Нам улууһа“ МО дьаһалтатын дьыалаларын салайааччы Петр Сергучев алтынньы 15 күнүгэр у...
„Нам улууһа“ МО дьаһалтатын дьыалаларын салайааччы Петр Сергучев алтынньы 15 күнүгэр улуус нэһилиэктэринэн, онтон алтынньы 16 күнүгэр М.К. Аммосов аатынан культура уонна духуобунай сайдыы дыбарыаһыгар анал байыаннай дьайыыга (СВО) сылдьар биир дойдулаахтарбытыгар аналлаах „Биир санаанан — биир сомоҕо“ көмө акция ыытылларын иһитиннэрдэ. Тэрээһин иккис күнүгэр нэһилиэктэр уонна тэрилтэлэр биир дойдулаахтарбытыгар анаан хомуйбут көмөлөрүн уопсай биир киин сиргэ туттарыахтара. Петр Петрович улуус тэрилтэлэрин тэрээһиниттэн тутулуга суох уонна бары олохтоохтору бары биир сомоҕо санааны түмэн, харысхал көмө акцияҕа көхтөөхтүк кытталларыгар уонна бэйэлэрин кылааттарын киллэрэллэригэр ыҥырда. ✅Маны таһынан, алтынньы 25 күнүгэр диэри посылкалары тутуу ыытыллыаҕа. ✅Кыра кээмэйдээх суднолар государственнай инспекциятын (ГИМС) Намнааҕы учаастагын салайааччыта Иннокентий Осипов нэһилиэк баһылыктарыгар туһаайан, СӨ транспортка уонна суол хаһаайыстыбатыгар министерствотын уонна „Нам улууһа“ МО баһылыгын уураахтарынан улуус үрдүнэн маломернай суднолар ууга тахсыылара алтынньы 7 күнүттэн тохтотуллубутун (навигация сабыллыбытын) санатта. Муус туруутун (ледостав) кэмигэр дьоҥҥо куттал суох буолууларын хааччыйар сыалтан, нэһилиэктэргэ сэрэтэр-өйдөтөр үлэни күүһүрдэргэ ыҥырда. Кини нэһилиэк баһылыктарыгар туһаайан, күөллэргэ, өрүскэ уонна протокаларга дьон уонна массыына киириитин бобор информационнай бэлиэлэри (аншлагтары уонна щиттары) туруоруу ирдэниллэрин, бу боппуруос кытаанах хонтуруолга турарын эттэ. ✅Физическэй культура уонна спорт управлениетын салайааччыта Павел Иванов нэһилиэктэр икки ардыларынааҕы комплекснай спартакиада уопсайа 22 көрүҥүттэн билигин 4 күрэхтэһии хаалбытын иһитиннэрдэ. Ол курдук, алтынньы уонна сэтинньи ыйдарыгар былаан быһыытынан дуобат, мини-футбол, баскетбол уонна ГТО элбэх көрүҥэр (многоборье) күрэхтэһиилэр ыытыллыахтара. ✅2027 сыл от ыйын 7–11 күннэригэр Ньурба улууһугар ыытыллар Саха сирин норуоттарын IX Спортивнай оонньууларыгар (Спартакиадатыгар) сүүмэрдиир күрэхтэһиилэр билигин былааннаахтык бара тураллар. Спартакиада уопсай былааныгар спорт 15 көрүҥэ киирбит. Нам улууһун хамаандата ыытыллыбыт 9 сүүмэрдиир күрэхтэһииттэн уопсайа 7 путёвканы ылары ситистэ диэн иһитиннэрдэ. Спартакиада финалларыгар кыттар быраабы ситиһэр сыаллаах сүүмэрдиир күрэхтэһиилэр салгыы бу сылга уонна кэлэр 2027 сыл сааһыгар диэри былаан быһыытынан ыытыллаллар диэн Павел Гаврильевич билиһиннэрдэ. Билигин Нам улууһун спортсменнара путёвкалары ыларга күүстээхтик бэлэмнэнэллэр, эрчиллэллэр диэтэ. Күндү биир дойдулаахтарбыт уонна улууспут ыалдьыттара! Суол халтархай буолан, айанныырга куттал улаатар. Хас биирдиигитин суолга өрүү сэрэхтээх буоларгытыгар, тиэтэйбэккэ, суол быраабылаларын тутуһан, бэйэ-бэйэҕитигэр ытыктабыллаахтык сыһыаннаһан айанныыргытыгар ыҥырабыт! «Нам улууһа” МО пресс - сулууспата