УЛУУС БАҺЫЛЫГЫН ПЛАНЕРКАТЫТТАН СОНУННАР
УЛУУС БАҺЫЛЫГЫН ПЛАНЕРКАТЫТТАН СОНУННАР Улуус баһылыгын социальнай боппуруостарга солбуйааччы Юрий Дьяконов бүгүн, алтынньы 12 күнүгэр, сарсыарда 9:00 чаастан улуус тэрилтэлэрин уонна дьаһалта отделларын, управлениеларын салайааччыларын кытта, күн иккис аҥарыгар 14:00 чаастан нэһилиэк баһылыктарын кытта планерка мунньахтары салайан ыытта. ✅Улуустааҕы киин балыыһа кылаабынай бырааһа Ариан Сергеев иһитиннэрбитинэн, бүгүҥҥү күҥҥэ улуус үрдүнэн грипп утары вакцинацияны ылыы былаана 64,48 % -ҥа тэҥнэспит. Грипп уонна ОРВИ утары сыллата быһыыны ылыы — сыстыганнаах ыарыылартан көмүскэнэр саамай эрэллээх ньыма. Саха сиригэр ыарыы күүһүрэр кэмэ сэтинньи бүтүүтүттэн саҕаланар, ол иһин организмы эрдэ көмүскүүр туһуттан быһыыны күһүн ылыы ирдэниллэр диэтэ. ✅Ааспыт нэдиэлэҕэ улуустааҕы киин балыыһа суһал медицинскэй көмөтүгэр (скорай) уопсайа 83 киһи наадыйбыт, мантан – 22- тэ оҕо. ✅Улуус үрдүнэн нэһилиэнньэ диспансеризацияны барыытын былаана 73,0 %-ҥа, онтон флюорографияны ааһыы 54,4%-ҥа тэҥнэспит. ✅Медицинскэй көрүүнү кэмигэр ааһыы — ыарыыны эрдэ быһаарарга уонна доруобуйаҕа кутталлаах содуллартан харыстанар саамай эрэллээх ньыма буолар. Улуустааҕы киин балыыһа кылаабынай бырааһа Ариан Сергеев нэһилиэктэринэн көһө сылдьар флюорографынан (передвижной ФЛГ) нэһилиэнньэни чинчийии кэмигэр олохтоохтор сылдьыылара мөлтөх диэн бэлиэтээтэ. Кини тэрилтэлэр салайааччыларыгар уонна нэһилиэк баһылыктарыгар туһулаан, үлэһиттэр уонна олохтоохтор медицинскэй бэрэбиэркэни кэмигэр ааһалларын хааччыйар туһугар, бу боппуруоһу бэйэлэрин тус хонтуруолларыгар ылалларыгар ыҥырда. ✅Алтынньы 22 күнүгэр Хамаҕатта нэһилиэгэр «Доруобуйа харыстабыла» (Здравоохранение) национальнай проект чэрчитинэн саҥа, аныгы кэм ирдэбиллэригэр эппиэттиир уонна стандартарыгар толору сөп түбэһэр врачебнай амбулатория үөрүүлээх арыллыыта ыытыллыаҕа. Бу бэлиэ күн өрөспүүбүлүкэ үрдүнэн хас да улуус кииннэригэр уонна нэһилиэктэригэр саҥа тутуллубут балыыһалар, фельдшерско-акушерскай пунктар (ФАП) тэҥҥэ арыллыахтара. Саҥа медицинскэй объектар арыллыыларын үөрүүлээх тэрээһинэ видеоконференцсвязь (ВКС) нөҥүө биир кэлимник, уопсай ситиминэн тэҥҥэ ыытыллыаҕа. Бу бэлиэ тэрээһиҥҥэ Ил Дархан Айсен Николаев кыттыыны ылыаҕа. ✅Кылаабынай быраас Арбын нэһилиэгэр кэлэр 2027 сылга саҥа фельдшерско-акушерскай пункт (ФАП) тутуллуута былааннанар диэн иһитиннэрдэ. ✅Роспотребнадзор Намнааҕы территориальнай отделын салайааччыта Марфа Игнатьева иһитиннэрбитинэн, бүгүҥҥү күҥҥэ улууска грипп уонна ОРВИ сыстыганнаах ыарыыларын тарҕаныыта эпидемиологическай боруогуттан намыһах таһымҥа турар. ✅Улуустааҕы үөрэх управлениетын салайааччыта Мария Игнатьева иһитиннэрбитинэн, улуус оскуолаларыгар бастакы чиэппэрдээҕи каникул алтынньы 26 күнүттэн саҕаланар. Бу нэдиэлэттэн чиэппэр түмүгүн таһаарар контрольнай үлэлэр ыытыллаллар. ✅И.С. Гаврильев аатынан Намнааҕы 1-кы нүөмэрдээх орто оскуолаҕа идэҕэ туһуламмыт анал педагогическай кылаас арыллыбыт. ✅Кэлэр нэдиэлэҕэ Нам улууһугар үөрэхтээһин ситимэ тэриллибитэ 155 сыллаах юбилейын бэлиэтиир үөрүүлээх тэрээһин улуус киинигэр — М.К. Аммосов аатынан культура уонна духуобунай сайдыы дыбарыаһыгар үрдүк таһымҥа тэриллэн ыытыллара былааннанар. ✅Улууска педагогическай маастарыстыбаны үрдэтэр, уопуту атастаһар сыаллаах «Сыл учуутала» (Учитель года) улуустааҕы уонна өрөспүүбүлүкэтээҕи таһымнаах профессиональнай күрэхтэр ыытыллыахтара диэн Мария Семеновна иһитиннэрдэ. ✅Улуустааҕы тыа хаһаайыстыбатын управлениетын начальнига Владимир Макаров иһитиннэрбитинэн, улууска үүтү туттарыы былаана 730 тоннанан аһары туолбут. Билигин СӨ тыатын хаһаайыстыбатын министиэристибэтин кытта ити көрдөрүүнү ааҕан туран, уопсайа 1 000 тонна үүтү туттарыыга эбии Сөбүлэҥи түһэрсиигэ үлэ барар. ✅Улууска олохтоох тыа хаһаайыстыбатын бородууксуйатын оҥорон таһаарааччылары өйүүр уонна нэһилиэнньэни аһынан – үөлүнэн хааччыйар сыаллаах, үгэс буолбут сыллааҕы идэһэ атыы – тутуу дьаарбаҥкатын сэтинньи ый саҕаланыытыгар тэрийэн ыытыы былааннанар.⤵️